जापानले पछिल्लो पटक ८ नेपालीलाई देश निकाला गर्‍यो

टोकियो – जापानमा अवैध रूपमा बसोबास गर्दै आएका ८ जना नेपालीलाई अध्यागमन विभागले निष्कासन गरेको छ । अध्यागमन कानुन उल्लंघन गरेको आरोपमा पक्राउ परेका ती नेपालीहरूलाई सोधपुछपछि नेपाल फर्काइएको हो ।

सूचना अनुसार निष्कासित व्यक्तिहरूमा सुनार, गुरुङ, मगर, पुलामी, जबेगु, खत्री र दुई जना ढकाल थरका रहेका छन् । उनीहरूलाई थाइ एयरलाइन्स, थाइ लायन एयर र क्याथे प्यासिफिकको उडानमार्फत नेपाल पठाइएको बताइएको छ । ती व्यक्तिहरू गत साता काठमाडौं पठाइएका हुन् ।

यद्यपि, उनीहरूले कुन-कुन विशेष कानुन उल्लंघन गरे भन्ने विवरण भने सार्वजनिक गरिएको छैन । जापानको अध्यागमन कानुन उल्लंघनसम्बन्धी घटनाहरूमा पछिल्लो समय कडाइ हुँदै गएको छ ।