समाचार सुन्नुहोस :
काठमाडौँ – आन्दोलनरत शिक्षकहरूको माग सम्बोधन गर्न शिक्षा, विज्ञान तथा प्रविधि मन्त्री विद्या भट्टराई आज अर्थ मन्त्रालय पुगेकी छन्। शिक्षकहरूको सेवा सुविधा र विधेयकको मुद्दा अर्थ मन्त्रालयसँग सम्बन्धित भएकोले उनले वित्तीय पक्षमा छलफल गर्ने बताइएको छ।
सरकारले मन्त्रिपरिषद् र सम्बन्धित मन्त्रालयको तत्काल निर्णय गरी संसदको आगामी अधिवेशनको पहिलो सातामै शिक्षा विधेयक पेस गर्ने तयारी गरेको छ। यसै क्रममा शिक्षकसंगको संवादलाई गति दिन मन्त्री भट्टराईले अर्थ मन्त्रालयको सहयोग खोजेकी हुन्। शिक्षा मन्त्रालयका प्रवक्ता शिवकुमार सापकोटाका अनुसार, शिक्षकहरूको केही माग आगामी बजेटबाट पूरा गर्ने गरी आन्तरिक तयारी भइरहेको छ। उनले यसअघि नै सरकारले समाधानका लागि गृहकार्य सुरु गरेको बताएका थिए।
शिक्षकहरूले कर्मचारी मैत्री शिक्षा ऐन जारी गर्न, सेवा सुविधा सुधार गर्न लगायतका माग राखी काठमाडौँमा आन्दोलनरत छन्। सरकारी प्रतिनिधिहरूसँग उनीहरूको लगातार छलफल भइरहेको छ। अर्थ मन्त्रालयमा भएको छलफलपछि शिक्षकसंग अन्तिम संवाद हुने अपेक्षा गरिएको छ।
