काठमाडौं – राष्ट्रिय स्वतन्त्र पार्टी (रास्वपा) का सभापति रवि लामिछानेलाई पुर्पक्षका लागि थुनामा पठाउने अदालतको आदेशविरुद्ध सर्वोच्च अदालतमा बन्दीप्रत्यक्षीकरणको रिट दायर गरिएको छ ।
रिट दर्ताबारे जानकारी दिँदै रास्वपाकी सहप्रवक्ता प्रतिभा रावलले शुक्रबार सर्वोच्च अदालतमा निवेदन दर्ता भएको बताइन् । लामिछानेको तर्फबाट अधिवक्ता नारायण कँडेलले रिट निवेदन पेस गरेका हुन् ।
गत शुक्रबार उच्च अदालत तुलसीपुरको बुटवल इजलासले सुप्रिम बचत तथा ऋण सहकारी ठगी प्रकरणमा लामिछानेलाई पुर्पक्षका लागि थुनामा पठाउने आदेश दिएको थियो । सो आदेशपछि उनलाई सोही रात बूढानीलकण्ठबाट पक्राउ गरी काठमाडौँ प्रहरी परिसरमा राखिएको थियो ।
रास्वपाको दाबीअनुसार अदालतको आदेश जिल्ला प्रशासनमा औपचारिक रूपमा नपुग्दै रातारात लामिछानेलाई नियन्त्रणमा लिइएको हो । पार्टीले यसलाई न्यायिक प्रक्रिया विना गरिएको गैरकानुनी पक्राउ भन्दै आपत्ति जनाएको छ ।
पक्राउपछि एक दिन काठमाडौँ र दुई दिन रुपन्देहीको हिरासतमा राखिएका लामिछानेलाई सोमबार कारागार चलान गरिएको थियो । यसै विषयमा राष्ट्रिय स्वतन्त्र पार्टीले बुधबार मानव अधिकार आयोगमा निवेदन दिँदै प्रहरी ज्यादती र मानव अधिकार हननको गुनासो गरेको छ ।
