काठमाडौं – तीनकुनेमा भएको प्रदर्शनका मुख्य अभियुक्त दुर्गा प्रसाईंलाई आज काठमाडौं जिल्ला अदालतमा पेश गरिएको छ । भारतबाट पक्राउ परेका प्रसाईंलाई आवश्यक कानुनी प्रक्रिया पूरा गरी जिल्ला प्रहरी परिसर काठमाडौंले केही समयअघि सरकारी वकिलको कार्यालयमार्फत अदालत पठाएको हो ।
प्रहरीका अनुसार, अनुसन्धानका लागि प्रसाईंलाई १२ दिनसम्म हिरासतमा राख्न म्याद थपको निवेदन गरिएको छ । उनीसँगै पक्राउ परेका उनका बडिगार्ड दीपक खड्काका लागि पनि समान अवधिको म्याद माग गरिएको छ ।
यसअघि, सोही घटनामा संलग्न भनी पक्राउ परेका राप्रपाका नेता रवीन्द्र मिश्र र धवलशमशेर जबरालाई १५ दिनको हिरासत म्याद दिइएको थियो । प्रहरी स्रोतका अनुसार, म्याद समायोजन गर्नका लागि प्रसाईं र खड्काका लागि १२ दिनको अवधि माग गरिएको हो ।
प्रसाईंविरुद्ध ज्यान मार्ने उद्योग लगायतका गम्भीर अभियोगमा मुद्दा दर्ता गर्ने तयारी भइरहेको बताइएको छ । गत चैत १५ गते तीनकुनेमा भएको प्रदर्शनपछि उनी फरार थिए । प्रहरी र सरकारी वकिलको समन्वयमा उनीविरुद्ध आवश्यक कानुनी कारबाही अघि बढाउने प्रक्रिया तीव्र रूपमा अघि बढाइएको छ ।
