समाचार सुन्नुहोस :
काठमाडौँ – काठमाडौँ महानगरपालिकाका कर्मचारीहरूले लामो समयदेखि रोकिएको तलब प्राप्त गरेका छन् । प्रमुख प्रशासकीय अधिकृत सरोज गुरागाईं कार्यालय फर्किएपछि कर्मचारीहरूले सोमबार कर्मचारीहरूलाई तलब पठाएको सहायक प्रवक्ता ध्रुवकुमार काफ्लेले जानकारी दिए ।
‘प्रमुख प्रशासकीय अधिकृत सर कार्यालय फर्किएपछि सबैको तलब आएको छ,’प्रवक्ता काफ्लेले भने, ‘अहिले सबैका मोबाइलका घण्टी बजिरहेका छन् । साँझसम्म सबैको तलब आउँछ । बिस्तारै सबै अवरोध हटेर जान्छ ।’ उनले थपे।
गत पुसमा मेयर बालेन्द्र शाहले गुरागाईंलाई अनधिकृत कार्यको आरोपमा बिदामा पठाएका थिए । त्यसपछि कर्मचारीहरूको तलब रोकिएको थियो । गुरागाईंलाई कार्यालय फिर्ता गराउन उपमेयए सुनिता डंगोल सहित कार्यालयको कर्मचारी र जनप्रतिनिधिहरूले दबाब दिनु परेको थियो।
अहिले गुरागाईंको कार्यालय फर्किएपछि तलब वितरण भएको छ । कर्मचारीहरूले ३ देखि ५ महिनादेखि तलब नपाएको गुनासो गर्दै आएका थिए।
