समाचार सुन्नुहोस :
काठमाडौँ – बुटवलको सुप्रिम बचत तथा सहकारी प्रकरणमा पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई आज प्रक्रिया पूरा गर्न रुपन्देहीस्थित जिल्ला अदालतमा उपस्थित गराइने भएको छ। जिल्ला प्रहरी कार्यालय रुपन्देहीका अनुसार आज कार्यालय खुलेपछि आवश्यक कानुनी प्रक्रिया पूरा गरेर लामिछानेलाई भैरहवा कारागार पठाइने तयारी गरिएको छ।
अदालतमा पेस गरेपछि उनलाई हिरासतमा राख्ने प्रक्रियालाई औपचारिकता दिनेछ। उच्च अदालत तुलसीपुरको बुटवल इजलासले लामिछानेविरुद्ध पक्राउ अनुमति दिएपछि उनलाई शुक्रबार काठमाडौंबाट पक्राउ गरिएको थियो। शनिबार विमानमार्फत भैरहवा ल्याइएपछि जिल्ला प्रहरी कार्यालयमा राखिएको हो।
सुप्रिम सहकारीमा ठगीसम्बन्धी आरोपमा मुछिएका लामिछानेविरुद्ध मुद्दा अघि बढेसँगै कानुनी प्रक्रिया अनुसार कारवाही अघि बढाइएको प्रहरीले जनाएको छ।
