टोकियो – जापानको राजधानी टोकियोमा युवतीमाथि यौन दुर्व्यवहार र लुटपाट गरेको आरोपमा एक युवक पक्राउ परेका छन् । प्रहरीले ३३ वर्षीय ट्याक्सी चालक योहोइ फुकुदालाई टोकियोको एक अपार्टमेन्टमा जबरजस्ती प्रवेश गरी २० वर्षकी महिलामाथि यौन दुर्व्यवहार र लुटपाट गरेको आरोपमा पक्राउ गरिएको हो ।
प्रहरीका अनुसार घटनास्थल टोकियोको अदाची वार्डमा बिहीबार बिहान करिब ४ बजे भएको हो । उनले हथौडा प्रयोग गरी अपार्टमेन्टको बालकोनीको झ्याल फुटाएर तेस्रो तलाको अपार्टमेन्टमा प्रवेश गरेका थिए । उनलाई ती महिलामाथि यौन दुर्व्यवहार गरेको र २० हजार येन नगद चोरी गरेको आरोप लागेको छ ।
प्रहरीले बताएअनुसार, फुकुदाले त्यसपछि ती महिलालाई छुरी देखाएर डराए, लुगा लगाउन बाध्य पारे र नजिकैको कनभिनियन्स स्टोरमा लगे जहाँ उनले एटिएम बाट ५० हजार येन निकाल्न लगाएका थिए । त्यसपछि उनी फरार भएका थिए । महिलाले तत्काल ११० मा फोन गरेर घटनाको जानकारी दिएकी थिइन् ।
प्रहरीले कनभिनियन्स स्टोरको निगरानी क्यामेराबाट फुकुदाको पहिचान गरेका थिए । उनलाई शुक्रबार साइतामा प्रिफेक्चरको एक मनोरञ्जनस्थलबाट पक्राउ गरिएको हो । ‘ती महिलालाई मैले चिनेका थिएन। मैले साथीबाट ऋण लिएको थिएँ र पैसाको अभाव थियो,’ फुकुदाले प्रहरीसँग भनेका छन्, ‘मलाई लाग्यो, मैले कुनै महिलालाई आक्रमण गरे भने उसले रिपोर्ट गर्दिन ।’
