समाचार सुन्नुहोस :
काठमाडौँ – काठमाडौं उपत्यकामा वायु प्रदूषण केही घटेको देखिए पनि अझै वातावरण स्वच्छ बन्न सकेको छैन। शनिबार हावा केही तीव्र चलेसँगै अघिल्ला दिनको तुलनामा वायुमण्डलको प्रदूषण कम भएको छ। तर, वायुगुणस्तर सूचकांक (AQI) अनुसार काठमाडौं अझै पनि विश्वकै सबैभन्दा प्रदूषित शहरको पहिलो स्थानमा रहेको छ। शनिबार दिउँसो समाचार तयार पार्दासम्म उपत्यकाको AQI स्तर २१६ मा मापन गरिएको थियो, जुन ‘अत्यधिक अस्वस्थ’ श्रेणीमा पर्छ।
वायुमण्डलीय सुधारका लागि अझै पर्याप्त वर्षा वा ठुलो हावा चल्नु आवश्यक पर्ने जल तथा मौसम विज्ञान विभागको मौसम पूर्वानुमान महाशाखाले जनाएको छ। महाशाखाका अनुसार हालका केही दिनमा तत्काल वर्षा हुने वा तीव्र हावा चल्ने सम्भावना छैन।
यसले गर्दा स्वास्थ्यमा असर पार्ने प्रदूषणको अवस्था केही दिन अझै कायमै रहने संकेत देखिएको छ। स्वास्थ्य विज्ञहरूले अत्यधिक प्रदूषणका कारण बालबालिका, वृद्धवृद्धा र स्वासप्रश्वासका समस्या भएका व्यक्तिहरूलाई विशेष सतर्कता अपनाउन सुझाव दिएका छन्।
