काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछानेलाई प्रहरीले पक्राउ गरेको छ । उपत्यका अपराध अनुसन्धान कार्यालयको टोलीले शुक्रबार साँझ उनलाई काठमाडौंको बुढानीलकण्ठस्थित हेपाली हाइटबाट नियन्त्रणमा लिएको हो ।
यो गिरफ्तारी उच्च अदालत तुलसीपुरको बुटवल इजलासको आदेशपछि भएको हो । अदालतले लामिछानेलाई बुटवलस्थित सुप्रिम सहकारी प्रकरणमा दोषी ठहर गर्दै पुर्पक्षका लागि थुनामा पठाउन आदेश दिएको थियो । न्यायाधीशद्वय रमेश ढकाल र स्वीकृति पराजुलीको संयुक्त इजलासबाट जारी भएको उक्त आदेशले यसअघि जिल्ला अदालत रुपन्देहीले तोकेको १ करोड धरौटीको फैसला उल्टाएको छ ।
सहकारी रकम ठगीको आरोपमा लामिछानेमाथि अनुसन्धान भइरहेको छ । जिल्ला अदालतको धरौटी आदेशप्रति असन्तुष्ट लामिछानेले त्यसविरुद्ध उच्च अदालतमा पुनरावलोकनको माग गरेका थिए । तर, अदालतले उनको निवेदन खारेज गर्दै थुनामै राख्नुपर्ने ठहर गरेको हो ।
अब उनलाई आइतबार अदालतमा उपस्थित गराइने तयारी प्रहरीले गरिरहेको छ । लामिछानेलाई अब भोलिमात्रै भैरहवा लगिने भएको छ । आज जिल्ला प्रहरी परिसर काठमाडौंको हिरासतमा राख्ने तयारी गरिएको छ ।
