एघार महिनादेखि मलेसियामा रोकिएको तिलमायाको शव आज नेपाल ल्याइँदै

समाचार सुन्नुहोस : 

काठमाडौँ – मलेसियामा ११ महिनाअघि हत्या गरिएकी नवलपरासीकी तिलमाया सार्कीको शव आज नेपाल ल्याइने भएको छ। २५ वर्षीया तिलमाया रोजगारीका लागि मलेसिया गएकी थिइन्। उनको हत्या पाकिस्तानी नागरिकले गरेको थियो। हत्याको अनुसन्धान नसकिएको भन्दै मलेसियाबाट शव नेपाल पठाउन ढिलाइ भएको थियो।

तिलमायाकी ७० वर्षीया आमा धनमायाले शव नेपाल ल्याउन विभिन्न निकायमा धाए पनि प्रक्रिया ढिलो भएको थियो। सुरक्षित आप्रवासन केन्द्रका रञ्जना लम्सालका अनुसार, शव ल्याउन ढिलाइ हुँदा परिवारले पाएको दुःखबारे समाचार प्रकाशन भएपछि यसले प्राथमिकता पाएको हो। शव बोकेको विमान सोमबार काठमाडौं आउने छ। शव बुझ्न तिलमायाकी दिदी नीलमाया काठमाडौं आइपुगेकी छिन्। शव ल्याउँदाको खर्च मलेसियन कम्पनीले बेहोर्ने छ। शव सोमबार नै नवलपरासी पुर्याइने बताइएको छ।