समाचार सुन्नुहोस :
काठमाडौँ – होलीको उत्सवमा मादक पदार्थ सेवन गरी सवारी साधन चलाउने विरुद्ध प्रहरीले कडा नियन्त्रण गरेको छ। काठमाडौँ, ललितपुर र भक्तपुर जिल्लामा ट्राफिक जाँच अभियान तीव्र बनाइएको छ। बालाजु चोक र दरबारमार्ग जस्ता प्रमुख स्थानहरूमा पनि प्रहरीको कडा निगरानी राखिएको छ।
होलीको अवसरमा मानिसहरूले मादक पदार्थ सेवन गरी सवारी चलाउने, उच्छृंखल व्यवहार गर्ने र जथाभावी गतिविधिहरू गर्ने सम्भावना रहेकाले प्रहरीले चेकपोइन्टहरूमा कडाइ गरेको छ। यसै क्रममा, नेपाल प्रहरीले काठमाडौंका १२० भन्दा बढी स्थानमा चेकपोइन्ट स्थापना गरी जाँच अभियान चलाएको छ। ट्राफिक प्रहरीको टोलीले उपत्यकाका विभिन्न ठाउँबाट मादक पदार्थ सेवन गरी चलाइएका सवारी साधनहरू नियन्त्रणमा लिँदै छ। यसबीच, अवैध गतिविधि गरेको आरोपमा प्रहरीले काठमाडौंबाट दर्जनौ मानिसलाई पक्राउ गरिसकेको छ।
