होलीमा भड्किला कार्यक्रम नगर्न काठमाडौं जिल्ला प्रशासनको अनुरोध

समाचार सुन्नुहोस : 

काठमाडौँ – काठमाडौं जिल्ला प्रशासन कार्यालयले होली पर्व मनाउँदा मर्यादा र अनुशासन कायम गर्न आग्रह गरेको छ। कार्यालयले होलीको नाममा भड्किला वा अरूको इच्छा विपरीत रंग लगाउने, पानी वा लोला हान्ने जस्ता कार्यहरू नगर्न सचेत गराएको छ। यसका साथै सामाजिक सद्भाव र भाइचारा बढाउँदै पर्व मनाउन अनुरोध गरिएको छ।

आज जारी विज्ञप्तिमा जिल्ला प्रशासनले होली मनाउँदा अरूको अधिकार हनन नहुने गरी साँस्कृतिक पर्वलाई मर्यादित, अनुशासित र व्यवस्थित ढङ्गले मनाउन आग्रह गरेको छ। साथै, कुनै पनि व्यक्तिले अमर्यादित, उच्छृङ्खल वा गैरकानूनी क्रियाकलाप गरेमा प्रचलित कानून अनुसार कडा कारवाही गरिने चेतावनी पनि दिइएको छ।