काठमाडौं – एलन मस्कको विद्युतीय सवारी कम्पनी टेस्लाको सेयरमूल्यमा निरन्तर गिरावट आएको छ । अमेरिकी राष्ट्रपति डोनाल्ड ट्रम्पको प्रशासनमा मस्क सामेल भएयता लगातार सातौँ हप्ता टेस्लाको सेयरमूल्य घटेको हो, जुन कम्पनीको १५ वर्षे इतिहासमै पहिलो पटक देखिएको घटना हो ।
गएको शुक्रबार टेस्लाको सेयरमूल्य २७०.४२ अमेरिकी डलरमा बन्द भयो । यो गत नोभेम्बर ५ मा अमेरिकी आम निर्वाचनको दिन २५१.४४ डलर रहेको थियो, भने डिसेम्बर १७ मा ऐतिहासिक रूपमा ४८० डलरसम्म पुगेको थियो । तर, त्यसयता लगातार सात हप्ता गिरावट आइरहेकाले कम्पनीले करिब ८०० अर्ब अमेरिकी डलर बजार मूल्य गुमाइसकेको छ ।
सेयरमूल्यको यो गिरावटपछि बैंक अफ अमेरिका, बेयर्ड र गोल्डम्यान साक्सलगायत प्रमुख वित्तीय संस्थाले टेस्लाको मूल्य प्रक्षेपण घटाएका छन् । विश्लेषकहरूका अनुसार टेस्लाका गाडीहरूको बिक्रीमा आएको कमी, मस्कले सस्तो मोडलको गाडी नल्याउने निर्णय, र चिनियाँ विद्युतीय सवारी ब्रान्डहरूबाट बढ्दो प्रतिस्पर्धा टेस्लाको सेयरमूल्य घट्नुका मुख्य कारण हुन् ।
त्यसैगरी, मस्कले ट्रम्प प्रशासनअन्तर्गत सरकारी प्रभावकारिता विभागको जिम्मेवारी सम्हालेपछि उनको राजनीतिक भूमिकाले पनि असर पारेको अनुमान गरिएको छ । राजनीतिक संलग्नताका कारण मस्क आलोचनाको पात्र बनेका छन्, जसले उनको कम्पनीप्रति लगानीकर्ताको विश्वासमा कमी ल्याएको बताइन्छ ।
