काठमाडौं – नेकपा (माओवादी केन्द्र)का सांसद जगप्रसाद शर्माले पूर्वराजा ज्ञानेन्द्र शाहलाई वंश विनाश गरेको आरोप लगाउँदै उनलाई राजा फर्काउने नाटक मञ्चन गरिरहेको दाबी गरेका छन् ।
राष्ट्रिय सभाको आइतबारको बैठकमा बोल्दै सांसद शर्माले नेपालमा राजतन्त्र अन्त्य गर्न कठिन संघर्ष भएको उल्लेख गर्दै हाल प्रतिगामी शक्तिहरू राजा पुनःस्थापनाको प्रयासमा लागेको बताए । उनले भने, ‘नेपालमा राजतन्त्र ढाल्न अढाइ सय वर्षदेखि गाढिएको निरंकुश सामन्तवादविरुद्ध लामो र चुनौतीपूर्ण संघर्ष गरियो । अहिले त्यसलाई पुनःस्थापित गर्न खोज्नेहरू नै विगतमा राजाको वंश विनाश गर्नेहरू हुन् ।’
शर्माले संविधान र व्यवस्थाविरोधी गतिविधिहरूलाई अराजकता भन्दै सरकार यसको नियन्त्रण गर्न असफल भएको आरोप लगाए । ‘संविधान र व्यवस्था विरोधी गतिविधिहरू रोक्न सरकारले किन कदम चाल्न सकिरहेको छैन? देशको आर्थिक अवस्था नाजुक छ, पुँजीगत खर्च ५० प्रतिशतसम्म पनि हुन सकेको छैन । यस्तो अवस्थामा राष्ट्रिय सहमति खोज्नु आवश्यक भए पनि त्यसमा पहल हुन सकेको छैन,’ उनले भने ।
सांसद शर्माले सरकारलाई प्रतिपक्षको आवाज सुन्न, अराजक गतिविधिहरू रोक्न कडा कदम चाल्न र आर्थिक संकट समाधान गर्न आग्रह गरे ।
