दिपक मनाङेले पाए कैद सजायमा २० प्रतिशत छुट

समाचार सुन्नुहोस : 

काठमाडौँ – राजीव गुरुङ उर्फ दीपक मनाङेले आफ्नो कैद सजायमा २० प्रतिशत छुट पाएका छन्। जिल्ला अदालत काठमाडौंका न्यायाधीश कमलप्रसाद पोखरेलको इजलासले शुक्रबार उनलाई बाँकी सजायमा २० प्रतिशत छुट दिने आदेश जारी गरेको हो।

मनाङेले मुलुकी ऐन दण्ड सजायको दफा ४१ (क) अनुसार छुट पाउने माग गर्दै निवेदन दिएका थिए। फागुन १२ गते दर्ता गरिएको उक्त निवेदनका आधारमा अदालतले छुट दिने निर्णय गरेको जिल्ला अदालत काठमाडौंका सूचना अधिकारी दीपककुमार श्रेष्ठले जानकारी दिए।

मुलुकी ऐनको दफा ४१ (क) अनुसार अन्तिम फैसला भएको ६० दिनभित्र अदालतमा आत्मसमर्पण गरेमा कैद तथा जरिवानामा २० प्रतिशत छुट दिने व्यवस्था छ।