पेरिसको व्यस्त रेलवे स्टेशनको ट्र्याकमा भेटियो दोस्रो विश्वयुद्धको बम

समाचार सुन्नुहोस : 

काठमाडौँ – फ्रान्सको गारे डु नोर्ड रेलवे स्टेशनमा दोस्रो विश्वयुद्धताकाको एउटा बम फेला परेको छ। यस घटनापछि स्टेशनमा सञ्चालन भइरहेको युरोस्टार तथा स्थानीय रेल सेवाहरू तत्कालै रद्द गरिएको बीबीसीले उल्लेख गरेको छ।यद्यपि, यो विस्फोट भने भएन।

स्थानीय मिडिया रिपोर्टअनुसार उक्त बम सेन्ट-डेनिस क्षेत्रमा रेलको ट्र्याकको बीचमा भेटिएको हो। सुरक्षाका कारण सेवाहरू अर्को सूचना नआएसम्मका लागि रोकिएको छ। यात्रुहरूलाई आफ्नो यात्रा मिति पर सार्न अनुरोध गर्दै युरोस्टारले लन्डन र पेरिसबीचका सेवा रद्द गरेको जानकारी दिएको छ।

गारे डु नोर्ड युरोपको सबैभन्दा व्यस्त रेलवे स्टेशनमध्ये एक हो। यहाँ दैनिक रूपमा ६ लाखभन्दा बढी यात्रुहरूले यात्रा गर्छन्।