नागोया – यतिबेला जापानमा व्यवसाय गर्ने नेपालीको संख्या हजारौं छ । रेष्टुरेन्ट व्यवसाय मात्र गर्ने नेपालीको संख्या जापानमा ५ हजार नाघेको तथ्याङ्क छ ।
जापानको तेस्रो ठूलो शहर नागोयामा रेष्टुरेन्ट व्यवसायसँगै नेपाली लोक संस्कृति जगेर्ना गर्न चौतारी रोधीघर सञ्चालनमा ल्याएको उक्त रोधीघरका सञ्चालक मनु थापाले बताए । त्यसो त उनको नागोया क्षेत्रमा नै त्यो बाहेक २ वटा नेपाली रेष्टुरेन्ट सञ्चालनमा रहेको छ । र पनि नेपाली कला संस्कृति जगेर्ना होस् भन्ने लागेर यो रोधीघर सञ्चालनमा ल्याएको थापा बताउँछन् ।
रोधिघर नागोयाको मारुनोउचिमा अवस्थित रहेको छ । रेष्टुरेन्ट हप्ताको पुरै दिन खुले पनि रोधी साँझ भने हाललाई हप्ताको ३ दिन शुक्रबार, शनिबार र आइतबार सञ्चालन हुने छ ।
रोधी साँझमा नेपाली गीत संगीतसँगै नेपाली परिकारको समेत स्वाद लिन पाइन्छ । करिब ६० सिट क्षमताको उक्त दोहोरी साँझमा विभिन्न कार्यक्रमसँगै जन्मदिन , वैवाहिक वर्षगाँठ लगायतका कार्यक्रम समेत गर्न सकिने बताइएको छ ।
रोधी साँझमा यतिवेला जापानमा रहेका नेपाली कलाकारहरुले गीत संगीत प्रस्तुत गर्ने गरेको र बेला-बेलामा नेपालबाट समेत साङ्गीतिक कार्यक्रमको लागि कलाकार आउने चौतारी रोधी साँझका सञ्चालक मनु थापाको भनाई छ ।
उनी भन्छन्- ‘मलाई नेपाली संगीत अनि बाजा प्रति ज्यादै नै चाख लाग्ने गर्छ । जापानमा हुने प्रायः नेपाली फेस्टिभलहरूमा आफू पुग्ने र नेपाली बाजाहरूको प्रचार-प्रसार गर्ने गरेको उनी सम्झन्छन् । जापानमा यति धेरै नेपालीहरू छौँ । यहाँ बाट जापनिजहरू लाई हाम्रो कला संस्कृतिको बारेमा चिनाऊ, आफूले पनि नेपाली गीत संगीतलाई माया गरौं ।’
