काठमाडौं – अमेरिका सरकारको कडा अध्यागमन नीतिअनुसार अवैध रूपमा बसोबास गरिरहेका नेपालीहरूलाई स्वदेश फिर्ता पठाउने क्रम जारी छ । गैरकानूनी रूपमा अमेरिकामा काम गरिरहेका तथा अध्यागमन अदालतबाट निष्कासन आदेश पाएका नेपाली नागरिक बोकेको अमेरिकी विमान काठमाडौंका लागि उडेको छ ।
अमेरिकी वायुसेवा कम्पनी ग्रिफोन एयरको चार्टर्ड जहाजमार्फत १० जना नेपाली नागरिक स्वदेश फिर्ता हुँदैछन् । त्रिभुवन अन्तर्राष्ट्रिय विमानस्थल स्रोतका अनुसार उक्त विमान काठमाडौं अवतरणका लागि अनुमति दिइएको छ । ग्रिफोन एयरको सानो विमान गल्फजेटस्ट्रिम आज बिहान १० बजे त्रिभुवन अन्तर्राष्ट्रिय विमानस्थलमा अवतरण गर्नेछ ।
जहाज अमेरिकाको न्यू ह्याम्पसायर राज्यस्थित पोर्टसमाउथ अन्तर्राष्ट्रिय विमानस्थलबाट उडिसकेको छ । अल्बानियाको तिराना अन्तर्राष्ट्रिय विमानस्थलमा केही यात्रुहरू ओरालेर सो जहाज नेपालका लागि उड्ने बताइएको छ । त्रिभुवन विमानस्थलमा अवतरण गरेपछि यी नेपालीहरूलाई अध्यागमन तथा अन्य आवश्यक कानुनी प्रक्रिया पूरा गरी सम्बन्धित निकायमार्फत अभिभावकत्वमा जिम्मा लगाइनेछ ।
यसअघि मंसिर ३० गते अमेरिका सरकारले चार्टर विमानमार्फत १५ जना नेपालीलाई स्वदेश फर्काइरहेको थियो । पछिल्लो समय अमेरिकी अध्यागमन नीति अझै कडा बनाइँदा अवैध रूपमा बसोबास गरिरहेका नेपालीहरू थप जोखिममा परेका छन् । अमेरिकी राष्ट्रपति डोनाल्ड ट्रम्पले दोस्रो कार्यकाल सम्हालेलगत्तै अवैधरूपमा अमेरिकामा बसिरहेका आप्रवासीलाई देशनिकाला गर्ने कडा नीति लागू गर्ने घोषणा गरेका थिए ।
नेपाल सरकार तथा सम्बन्धित निकायले अमेरिकी अध्यागमन नीतिका कारण आफ्ना नागरिकलाई पर्ने प्रभावको मूल्यांकन गर्दै आवश्यक सहयोग गर्ने प्रतिबद्धता जनाएको छ । अध्यागमन मामिलासँग जोडिएका कानुनी सल्लाहकारहरूले नेपाली नागरिकलाई विदेश यात्रा गर्नुअघि आवश्यक कागजात पूरा गर्न र कानुनी प्रक्रिया पूरा गरेर मात्रै यात्रा गर्न सुझाव दिएका छन् ।
आगामी दिनमा अमेरिकाबाट थप नेपालीहरूलाई फिर्ता पठाइने सम्भावना रहेको अनुमान गरिएको छ । अमेरिकी अध्यागमन विभागले गैरकानुनी आप्रवासीहरूलाई लक्षित गर्दै व्यापक छानबिन गरिरहेको बताइन्छ ।
