समाचार सुन्नुहोस :
काठमाडौँ – ललितपुरको महालक्ष्मी नगरपालिका–५ टिकाथलीमा पानीका लागि बोरिङ खन्दै गर्दा अचानक आगोको ज्वाला निस्किएको छ। गोदावरी खोलानजिक भइरहेको खानेपानीको बोरिङ खन्ने क्रममा ग्यास निस्किएर आगो लागेको हो। एक्कासि ग्यासको मुस्लासहित आगो निस्केपछि स्थानीयवासीमा त्रास फैलिएको छ। जसका कारण बोरिङ खन्ने कार्य तत्काल रोकिएको छ।
मंगलबार बिहान टीकाथली र चांगाथलीबीच रहेको गोदावरी खोला नजिक डिप बोरिङ गर्ने क्रममा ग्यास निस्किएर आगो लागेको हो। बिहान ९:३० बजे सुरु भएको आगलागी झन्डै दुई घण्टा बढी प्रयासपछि नियन्त्रणमा आएको महालक्ष्मी नगरपालिका वडा नम्बर ५ का वडाध्यक्ष कपिल केसीले जानकारी दिए।
महालक्ष्मी नगरपालिकाका केहि स्थानमा यसअघि पनि इनार र बोरिङ खन्ने क्रममा ग्यास निस्किएको थियो।
