बानेश्वरमा झडप हुँदा डीएसपी घाइते, टाउकोमा चोट

समाचार सुन्नुहोस : 

काठमाडौँ – काठमाडौंको नयाँ बानेश्वरमा आइतबार दिउँसो स्वर्गद्वारी गुठी पीडित मोही किसान संघर्ष समितिको प्रदर्शनका क्रममा प्रहरी र प्रदर्शनकारीबीच झडप भएको छ।

प्रदर्शनकारीहरूले निषेधित क्षेत्र पार गर्ने प्रयास गरेपछि झडप भएको बताइएको छ। सो क्रममा प्रहरी वृत्त सिंहदरबारका इन्चार्ज, डीएसपी गंगा पौडेल घाइते भएका छन्। घाइते डीएसपी पौडेलको नयाँ बानेश्वरस्थित सिभिल अस्पतालमा उपचार भइरहेको छ। उनको टाउकोमा चोट लागेको छ। त्यस्तै, केही प्रदर्शनकारीहरू पनि घाइते भएको जानकारी आएको छ।

झडपपछि क्षेत्रको अवस्था सामान्य भइसकेको जिल्ला प्रहरी परिसर, काठमाडौंका प्रवक्ता एसपी अपिल राज बोहराले बताएका छन्। संघर्ष समितिले केही समयदेखि निरन्तर रुपमा आफ्नो माग पूरा गर्न दबाब स्वरूप प्रदर्शन गरिरहेको छ।