काठमाडौं – भारतको उत्तर प्रदेशस्थित प्रयागराजमा ४५ दिनसम्म चलेको महाकुम्भ महोत्सव औपचारिक रूपमा सम्पन्न भएको छ । विश्वकै सबैभन्दा ठूलो धार्मिक तथा आध्यात्मिक जमघटको रूपमा लिइने यस पर्वमा ६६ करोड ३० लाखभन्दा बढी भक्तजनहरूले भाग लिएका छन् ।
कुम्भ मेलाका अधिकारीहरूका अनुसार अन्तिम दिन मात्रै १ करोड ५३ लाख भक्तजनले पवित्र स्नान गरेका थिए । प्रत्येक १२ वर्षमा आयोजना गरिने यो महाकुम्भ हिन्दु धर्मावलम्बीका लागि पवित्र तथा ऐतिहासिक पर्व हो । यो अवसरमा देशविदेशबाट आएका श्रद्धालुहरूले त्रिवेणी संगममा स्नान गरेर धार्मिक अनुष्ठान तथा पूजापाठ गरेका थिए । उत्तर प्रदेशको राजधानी लखनऊदेखि करिब १९६ किलोमिटर दक्षिणमा अवस्थित प्रयागराजमा यो महोत्सव सम्पन्न भएको हो ।
यस वर्षको महाकुम्भलाई व्यवस्थित बनाउन उत्तर प्रदेश सरकार, स्थानीय प्रशासन तथा विभिन्न धार्मिक संघसंस्थाहरूले व्यापक तयारी गरेका थिए । भक्तजनहरूको सुरक्षाका लागि हजारौं सुरक्षाकर्मी परिचालित गरिएको थियो भने आपत्कालीन उद्धारका लागि स्वास्थ्यकर्मी तथा स्वयंसेवकहरू पनि खटाइएका थिए ।
महाकुम्भ मेलामा स्नानलाई अत्यन्तै महत्वपूर्ण मानिन्छ । धार्मिक मान्यताअनुसार, कुम्भ मेलामा त्रिवेणी संगम (गंगा, यमुना र अदृश्य सरस्वती नदीको संगमस्थल) मा स्नान गर्दा पाप मुक्त भइ मोक्ष प्राप्त हुने विश्वास गरिन्छ। त्यसैले पनि लाखौं श्रद्धालुहरू बिहानैदेखि लामबद्ध भएर पवित्र स्नानमा सामेल भएका थिए । महाकुम्भ मेला केवल धार्मिक पर्व मात्र नभएर सांस्कृतिक रूपमा पनि अत्यन्तै महत्त्वपूर्ण मानिन्छ ।
