काठमाडौं – हराएको करिब पाँच महिनापछि काभ्रेको मण्डनदेउपुर नगरपालिका-११ की ३८ वर्षीया निशा लामाको कंकाल भेटिएको छ । उनको कंकाल पाँचखाल नगरपालिका-३ स्थित जङ्गलमा भेटिएको हो ।
लामाको हत्या अभियोगमा प्रहरीले बिहीबार धुलिखेल नगरपालिका-६ का ३६ वर्षीय सुनिल रञ्जितकारलाई पक्राउ गरेर अनुसन्धान थालेको छ । लामा गत असोज १५ गतेदेखि हराएकी थिइन् । सोही दिन लामा औषधि खरिदका लागि घरबाट तामाघाट जान्छु भनेर हिँडेको र घर नफर्केपछि उनका श्रीमान् राइफल लामाले प्रहरीमा खोजबिनका लागि निवेदन दिएका थिए ।
निशाको कंकाल बुधबार दिउँसो २ बजे पाँचखालको काफ्लेडिही नजिकको जङ्गलमा फेला परेको थियो । निशाको कंकालसँगै ब्याग, चप्पल र ब्यागभित्र निशा लामा लेखिएको बिल फेला परेका कारण उक्त कंकाल श्रीमती निशाकै भएको भनी लामाले सनाखत गरेको प्रहरी निरीक्षक दिनेशबहादुर कुँवरले जानकारी दिए । उनका अनुसार निशाका श्रीमान् लामाले रन्जितकारविरुद्ध बिहीबार जाहेरीसमेत दर्ता गराएका छन् ।
प्रहरीका अनुसार जाहेरीमा पक्राउ परेका सुनिल रञ्जितकारले निशालाई काभ्रेपलाञ्चोककै बनेपामा भेटी ललाइफकाइ गरी झुक्याएर काफ्लेडिहीको जङ्गलमा लगेको र हत्या गरेको आरोप छ । रञ्जितकारले भने निशाले आफूलाई ‘जबर्जस्तीकरणीको अभियोग’मा फसाइदिन्छु भनेकाले आवेशमा आएर धारिलो हतियार र ढुङ्गाले टाउको तथा संवेदनशिल अङ्गमा प्रहार गरेर हत्या गरेको स्वीकारेको प्रारम्भिक अनुसन्धानबाट खुलेको जनाइएको छ । निशाका दुई छोरा र एक छोरी छन् ।
