समाचार सुन्नुहोस :
काठमाडौं – संघीयता लागूपछि बागलुङमा १० वटा पालिका भए । त्यसअघि बागलुङ नगरपालिका मात्र अस्तित्वमा थियो । २०७३ सालमा स्थापना भएका बागलुङका नौ पालिका सुरुवाती चरणमा भाडाको भवनबाट सञ्चालन भएका थिए। हालसम्म तीमध्ये छवटा पालिकाले आफ्नै भवनबाट सेवा प्रवाह गर्न सफल भएका छन्। गलकोट र जैमिनी नगरपालिकाका भवन निर्माणको अन्तिम चरणमा छन् भने ढोरपाटन नगरपालिकाले फागुनदेखि आफ्नै कार्यालयबाट सेवा दिन थालेको छ।
करिब ४ करोड ५९ लाख रुपैयाँ लागतमा निर्माण भएको छ तलाको पक्की भवनले कार्यालय सञ्चालन खर्च घटाएको छ। काठेखोला गाउँपालिकाले अझै आफ्नै भवन निर्माणका लागि जग्गा टुंग्याउन सकेको छैन। ताराखोला गाउँपालिकाले सुविधासम्पन्न भवन बनाएको एक वर्षपछि बडिगाड गाउँपालिकाले पनि आफ्नै भवन निर्माण सम्पन्न गरेको छ।
संघीयतासँगै सिंहदरबारका सेवा गाउँमै पुर्याउने लक्ष्य अनुसार तमानखोला, निसीखोला, र बरेङ गाउँपालिकाले पनि आफ्नै भवनबाट सेवा प्रवाह गरिरहेका छन्। यसले स्थानीय प्रशासनलाई व्यवस्थित गर्दै सेवाग्राहीलाई थप सहजता पुगेको छ।***
