टोकियो – जापानमा विवाहपछि अन्तरंगताको गिरावट आएको तथ्य एक सर्वेक्षणले उजागर गरेको छ । जापान परिवार नियोजन संघकाअनुसार लगभग आधा विवाहहरू यौनविहीन हुने गरेको देखिएको हो ।
सर्वेक्षणमा सहभागीहरूले लामो कार्यघण्टा, बालबच्चाको हेरचाह र विवाहपछिको यौन सम्बन्धलाई ‘मेन्दोकुसाई’ (झन्झटिलो) महसुस गर्ने प्रवृत्ति मुख्य कारणका रूपमा उल्लेख गरेका छन् । २०२४ मा गरेको सर्वेक्षणअनुसार, १६-४९ वर्षका ४८ दशमलव ३ प्रतिशत विवाहित व्यक्तिहरू महिनामा एक पटकभन्दा कम सेक्स गर्ने अर्थात् सेक्सविहीन सम्बन्धमा रहेको पाइएको छ । २००४ मा यो दर ३१ दशमलव ९ प्रतिशत मात्र थियो, जसले जापानमा वैवाहिक अन्तरंगतामा निरन्तर गिरावट देखाउँछ ।
यौन रुचिको मामलामा ८० प्रतिशत जापानी पुरुषहरूले सेक्सप्रति चासो देखाए पनि, ४० प्रतिशत महिलाहरूले यौन सम्बन्धमा कुनै रुचि नभएको बताएका छन् । सेक्सविहीन सम्बन्धका कारणहरू पुरुष र महिलाका लागि फरक देखिएका छन् :-
- पुरुषहरूको मुख्य गुनासो (२४ प्रतिशत) भनेको पार्टनरको चासोको कमी थियो ।
- महिलाहरूमा २२ दशमलव६ प्रतिशत ले सेक्सलाई ‘धेरै झन्झटिलो’ महसुस गरेको बताए, जुन पुरुषहरू (१२ प्रतिशत) को तुलनामा दोब्बर बढी हो ।
यसको एउटा असर व्यभिचार (बेवफाइ) पनि हो । जापानमा विवाहबाहिरका सम्बन्धहरूको संस्कृति जटिल छ र कतिपय अवस्थामा विवाहित जोडीबीच मौन स्वीकृति पनि पाइन्छ । अन्य देशहरूमा व्यभिचारले प्रायः विवाह टुंग्याउँछ, तर जापानमा कतिपय जोडीहरूले यसलाई परिवारलाई बचाइराख्ने एउटा विकल्पका रूपमा पनि लिन्छन् ।
हरेक सम्बन्ध फरक हुन्छ, तर जापानमा सेक्सविहीन विवाह एउटा गहिरो सामाजिक समस्या बनिरहेको छ । धेरै विदेशी पुरुषहरू विवाह वा बच्चा जन्मेपछि आफ्नो जापानी पार्टनर किन टाढा भएको महसुस गर्छन् भनेर बुझ्न संघर्ष गर्छन् । के यो सांस्कृतिक अन्तर हो ? जैविक कारण हो ? कि आधुनिक जीवनशैलीको दुष्परिणाम ?
जापानको कठोर कार्यसंस्कृतिले केवल पुरुषहरूलाई मात्र होइन, महिलाहरूलाई पनि थकाइरहेको छ । धेरै विवाहित महिलाहरू पूर्णकालीन जागिर गर्छन्, तर घर फर्केपछि अधिकांश घरायसी कामको जिम्मेवारी पनि उनैको काँधमा आउँछ । अनुसन्धानले देखाएको छ कि जापानी पुरुषहरूले पश्चिमी देशका पुरुषहरूको तुलनामा घरायसी काममा निकै कम योगदान गर्छन् । ओइसीडी (OECD) को एक रिपोर्टअनुसार, जापानी पुरुषहरूले अध्ययनमा समावेश सबै राष्ट्रहरूमा सबैभन्दा कम घरायसी काम गर्ने गरेको पाइयो ।
त्यसैले, राति ओछ्यानमा जानुअघि यौन सम्बन्ध प्राथमिकता बन्न नसक्नु स्वाभाविक हो । यदि एक महिला दिनभरि नै शारीरिक र मानसिक रूपमा थकित भइसकेकी छिन् भने, सेक्सलाई उनले थप एउटा जिम्मेवारीका रूपमा मात्र अनुभव गर्न सक्छिन् ।
यदि विवाहपछि सेक्स घट्छ भने, बच्चा भएपछि त यो झन् पूर्णरूपमा रोकिन सक्छ । जापानमा धेरै साना बालबालिकाहरू वर्षौंसम्म आमाबाबुसँग एउटै ओछ्यानमा सुत्ने चलन छ, जसले निजी समयको अवसर नै समाप्त पार्छ । त्यसमाथि, जापानका घरहरू साना र पातला पर्खाल भएका हुन्छन्, जसले गर्दा जोडीहरूलाई अन्तरंग हुने वातावरण मिलाउन कठिन हुन्छ ।
तर, यो केवल भौतिक सीमाको कुरा होइन-यो मानसिकता परिवर्तनको पनि कुरा हो । बच्चा भएपछि धेरै जापानी जोडीहरूले एकअर्कालाई रोमान्टिक पार्टनरको रूपमा हेर्न छोड्छन् । पतिपत्नीबीच ‘ओतोसान’ (बुबा) र ‘ओकासान’ (आमा) भनेर सम्बोधन गर्ने चलनले उनीहरूको सम्बन्धलाई केवल अभिभावकीय भूमिकामा सीमित गरिदिन्छ । धेरै विदेशी पतिहरूका लागि यो सांस्कृतिक परिवर्तन निकै चकित पार्ने खालको हुन्छ ।
जापानमा परिवार सुरु गरेका विदेशी जोडीहरूका लागि यो अवस्था आश्चर्यजनक हुनसक्छ । अधिकांशले सन्तान हुँदा अन्तरंग सम्बन्ध केही समयका लागि प्रभावित हुने अपेक्षा राख्छन्, तर समयसँगै सुधार हुने आशा पनि गर्छन् । तर, धेरै जापानी दम्पतीका लागि एक पटक ‘आमा’ वा ‘बुबा’ भइसकेपछि, यौन सम्बन्ध पुनःस्थापना हुने सम्भावना निकै कम हुन्छ । यसले गर्दा कतिपय विदेशी जीवनसाथीहरू अनपेक्षित र निराशाजनक परिस्थितिको सामना गर्न बाध्य हुन्छन् ।
