टोकियो – जापानको सिजुओका सहरमा ‘बिरुपाकु’ नामक पहलले खाली व्यावसायिक भवनहरूलाई सुविधाजनक अतिथि आवासमा रूपान्तरण गर्दै स्थानीय पर्यटन प्रवर्द्धन तथा आर्थिक पुनरुत्थानमा योगदान पुर्याइरहेको छ । ‘बिरुपाकु’नाम जापानी शब्द ‘बिल्डिङ’ (भवन) र ‘पाकु’ (आवास)को संयोजन हो ।
यो अवधारणा अन्तर्गत, खाली व्यावसायिक ठाउँहरूलाई आधुनिक अतिथि कक्षमा परिणत गरिन्छ । यद्यपि, परम्परागत होटेलहरू जस्तो सेवा नदिई, बिरुपाकुले पाहुनाहरूलाई स्थानीय रेस्टुरेन्टमा खान प्रोत्साहित गर्दै समुदायसँगको अन्तरक्रिया बढाउने लक्ष्य राखेको छ ।
यो आइडिया सीएसए रियल इस्टेट कर्पोरेशनका अध्यक्ष ५३ वर्षीय ताकाहितो कोजिमाले अघि सारेका हुन् । जेआर सिजुओका स्टेशन वरपर कम्पनीका भाडामा नलागेका भवनहरू बढ्दै गएपछि उनले शहरी क्षेत्रको गिरावट रोक्न नयाँ उपायको खोजी गरे । सन् २०२० मा स्थानीय व्यापार संघसँग मिलेर सुरु गरिएको यो परियोजनाअन्तर्गत हालसम्म सात स्थानमा १२ वटा कोठा तयार पारिएका छन् । यी सबै कोठा स्टेशनबाट १५ मिनेटको पैदल दूरीभित्र पर्छन् र ३ देखि ७ जना पाहुनाहरूलाई सहज रूपमा राख्न सकिन्छ ।
बिरुपाकुका कोठाहरू प्रशस्त ठाउँ भएका, आधुनिक र सौन्दर्यपूर्ण डिजाइनसहितका हुन्छन् । केही कोठामा परम्परागत इन्शु कपडाबाट बनेका कुशन राखिएको छ, जुन सिजुओकाको पश्चिमी क्षेत्रमा बुनेका विशेष कपडाहरू हुन् । केही कोठाहरूमा ‘टामिया इन्क’ नामक चर्चित मोडल किट निर्माता कम्पनीका प्लास्टिक मोडलका भागहरू प्रदर्शन गरिएका छन् ।
बाहिरबाट साधारण देखिने यी भवनहरूभित्र आकर्षक सजावट देख्दा पाहुनाहरू आश्चर्यचकित हुने गरेको संचालकहरू बताउँछन् । ५७ वर्षीय चक्कु पसलका मालिक चिहारु नुमाता बिरुपाकु परियोजनाका साझेदारमध्येका एक हुन् ।
उनले आफ्नै भवनको तेस्रो तला र छत भाडामा दिएका छन् । ‘यदि कुनै भवन प्रयोगविहीन रह्यो भने त्यसको अवस्था बिग्रँदै जान्छ । म यसलाई राम्रो प्रयोजनमा ल्याउन सकेकोमा खुसी छु,’ नुमाताले भने, ‘पाहुनाहरू यहाँ बसेपछि मेरो पसलमा पनि आउने गर्छन्, जसले व्यवसायलाई अप्रत्याशित फाइदा पुगेको छ ।’
सिजुओका प्रान्तमा विश्वप्रसिद्ध माउन्ट फुजी र इजु प्रायद्वीप जस्ता लोकप्रिय पर्यटकीय स्थलहरू छन् । तर सिजुओका सहर पर्यटकहरूको प्राथमिक गन्तव्य बन्न सकेको छैन । सीएसए ट्राभल कर्पोरेशनकी ३७ वर्षीया मामी नाशिमोटो भन्छिन्, ‘धेरै पर्यटकहरू तोकाइदो शिन्कान्सेनमार्फत सिजुओका सहर पार गरेर जान्छन् । हामी चाहन्छौं कि उनीहरू यहाँ बसी केही समय बिताउन चाहून् ।’
