काठमाडौं – भारतीय प्रधानमन्त्री नरेन्द्र मोदीको भारतीय जनता पार्टी (भाजपा) राजधानी सहर दिल्लीमा बहुमततर्फ अग्रसर देखिएको छ । दिल्लीको ७० सदस्यीय राज्यसभामा भाजपाले ४८ सिटमा अग्रता लिइरहेको छ ।
सन् २०१३ यता दिल्ली सरकार सञ्चालनको नेतृत्व गरिरहेको अरविन्द केजरीवालको आम आदमी पार्टी (आप) को २२ सिटमा अग्रता छ । आपका नेता पूर्वमुख्यमन्त्री अरविन्द केजरीवालले दिल्लीको चुनावमा आफ्नो हार स्वीकार गरेका छन् । उनी भाजपाका उम्मेदवार प्रवेश बर्मासँग ३,००० भन्दा बढी मतान्तरले पराजित भए ।
उनले सामाजिक सञ्जालमा एक भिडियो सन्देश पोस्ट गर्दै भनेका छन्- ‘जनताको फैसलालाई हामी पूर्ण रूपमा विनम्रताको साथ स्वीकार गर्छौँ ।’
उनले दिल्ली निर्वाचन परिणामलाई लिएर भाजपालाई बधाई दिएका छन् । राज्यसभाको आधा अर्थात् ३५ सीट जित्ने पार्टीले दिल्लीमा नयाँ सरकार गठन गर्न सक्छ । देशको राजधानीको सहर भएका कारण पनि दिल्ली राज्यसभाको निर्वाचनलाई भाजपा र आपले प्रतिष्ठाको विषय बनाएका थिए । भारतको राजधानी सङ्घीय प्रशासित क्षेत्र हो ।
मतदाताले कल्याणकारी मुद्दालाई समर्थन गरेसँगै यहाँ सन् २०१३ यता केजरीवालको आपले सरकार चलाइरहेको थियो । तर पछिल्लो समय केजरीवालसहित उनको दलका नेताहरूमाथि भ्रष्टाचारको आरोप लागेको छ । केजरीवाल र आपका नेताहरूले आफूमाथि लागेको आरोपको खण्डन गर्दै आएका छन् ।
भाजपाका लागि राजधानी सहरमा देखिएको निर्वाचन परिणाम चुनावी सफलतामा मात्रै सीमित छैन । सन् १९९८ यता राजधानीमा सत्ता बाहिर रहेको भाजपाले यो निर्वाचनसँगै राजधानीमा महत्त्वपूर्ण आधार पाएको छ । बीबीसी
