समाचार सुन्नुहोस :
काठमाडौँ – चितवन राइनोजले नेपाल प्रिमियर लिग (एनपीएल) को पहिलो खेलमा काठमाडौं गुर्खाजलाई ५ विकेटले पराजित गर्दै प्रतियोगितामा विजयी सुरुवात गरेको छ। यस जितसँगै चितवनले २ अंक हासिल गरेको छ।
काठमाडौंले प्रस्तुत गरेको ११२ रनको लक्ष्य चितवनले १७ ओभरमा ५ विकेटको क्षतिमा सहजै पूरा गर्यो। चितवनका सन्तोष कार्कीले ३१ बलमा २ चौका र १ छक्का प्रहार गर्दै अविजित २८ रन बनाए। लुक बेन्केन्सटेइनले २२ रनको योगदान दिए भने शरद भेषावकर ११ रनमा अविजित रहे। काठमाडौंका बलर शाहब आलमले ३ विकेट लिए पनि चितवनलाई रोक्न असफल रहे।
यसअघि, टस हारेर पहिले ब्याटिङ गरेको काठमाडौंले २० ओभरमा ९ विकेट गुमाएर मात्र १११ रन बनाएको थियो। काठमाडौंका सुमित महर्जनले २९ रन र माइकल लेभिटले २५ रन बनाए। चितवनका लागि सोहेल तनविर बलिङमा चम्किए। उनले ४ ओभरमा २१ रन खर्चेर ५ विकेट लिएर उत्कृष्ट प्रदर्शन गरे।
