हंगेरीलाई स्तब्ध पार्दै जर्मनी अन्तिम १६ मा प्रवेश

काठमाडौं – आयोजक जर्मनी युरो कप २०२४ को अन्तिम १६ मा पुगेको छ । गएराति सम्पन्न खेलमा हंगेरीलाई २-० ले हराउँदै जमर्नी एक खेलअगावै अन्तिम १६ मा पुगेको हो ।

जर्मनीले पहिलो खेलमा स्कटल्याण्डलाई ५-१ ले हराएको थियो । दोस्रो खेलमा जर्मनीको जितमा जमाल मुसियाला र इलकाय गुन्डोगानले १-१ गोल गरे । खेलको २२औं मिनेटमा गुन्डोगानको पासमा गोल गर्दै मुसियालाले जर्मनीलाई सुरुवाती अग्रता दिलाए । ६७औं मिनेटमा म्याक्सीमिलियन मिटेल्सताइड्टको क्रसमा गुन्डोगानले गोल गर्दै जर्मनीलाई २-० को सहज जित दिलाए ।

यो जितपछि समूह ‘ए’ को जर्मनीले २ खेलबाट ६ अंक जोडेको छ । पहिलो खेलमा स्विट्जरल्यान्डसँग पराजित भएको हंगेरी २ खेल खेल्दा अंकविहीन छ । गएराति नै भएको खेलमा क्रोएसिया र अल्बानियाले २-२ को बराबरी खेले ।