सांसद डा. चन्द्र भण्डारी चाँडै स्वदेश फर्किने

काठमाडौं – भारतको मुम्बईमा उपचार गराइरहेका नेपाली काँग्रेसका सांसद डा.चन्द्र भण्डारीको पछिल्लो स्वास्थ्य अवस्था सामान्य बन्दै गएको छ ।

प्राप्त पछिल्लो स्वास्थ्य अपडेट अनुसार उनको अनुहारमा ७० प्रतिशत सुधार आएको छ । डा.भण्डारीको सचिवालयले डा.भण्डारी चाँडै नै स्वस्थलाभ गरेर नेपाल फर्कने उल्लेख गरेको छ ।

गत फागुनको पहिलो साता बुद्धनगरस्थित निवासमा ग्यास लिक भएर आगलागी हुँदा डा.भण्डारी तथा उनकी आमा हरिकला भण्डारी गम्भीर घाइते भएका थिए । डा.भण्डारीकी आमाको उपचारकै क्रममा कीर्तिपुर अस्पतालमा निधन भएको थियो ।

डा.भण्डारीलाई भने थप उपचारका लागि मुम्बई लगिएको थियो । मुम्बईमा झण्डै डेढ महिनाको उपचारपछि डा. भण्डारीको स्वास्थ्यमा प्रशस्त सुधार आएको हो ।