काठमाडौं – पूर्वराजा ज्ञानेन्द्र शाहले हिमानी ट्रस्टलाई सहयोग गरेका छन् । शाहले आफ्नो भाषण र अन्तर्वार्ता संग्रह बिक्रीका लागि ट्रस्टलाई हस्तान्तरण गरेका हुन् ।
सन्देश संग्रह नामक सो कृतिमा पूर्वराजा शाहले विभिन्न देशमा दिएको भाषण र प्रकाशित अन्तर्वार्ताको संग्रह समेटिएको छ ।
ट्रस्ट अध्यक्ष हिमानी शाहले आइतबार काठमाडौंमा पत्रकार सम्मेलन आयोजना गरी पूर्वराजा ज्ञानेन्द्रबाट ट्रस्टका लागि ५०० प्रति उक्त संग्रह प्राप्त भएको जानकारी गराइन् । प्राप्त संग्रहको बिक्रीबाट आएको रकमबाट ट्रस्टले दैवीप्रकोपका पीडितलाई सहयोग गर्ने हिमानीले बताइन् ।
ट्रस्टका अनुसार संग्रहमा पूर्वराजा ज्ञानेन्द्रले शासनसत्तामा हुँदा नेपालको राजनीतिक अवस्था, कूटनीतिक सम्बन्ध, अन्तर्राष्ट्रिय आर्थिक सहयोग आदिबारे विभिन्न देशमा पुगेर गरेको भाषण समावेश छ । नेपालका मूलधारका विभिन्न सञ्चारमाध्यममा दिएको अन्तरवार्ता पनि संगृहीत छ ।
पुस्तकको मूल्य ५ हजार ५ सय ५१ रुपैयाँ रहेको छ ।
