पाकिस्तान – पाकिस्तानका ब्याट्सम्यान युनुस खानले अन्तर्राष्ट्रिय क्रिकेटबाट सन्यासको घोषणा गरेका छन् । वेष्ट इन्डिजसँगको तीन टेस्टको श्रृँखलापछि सन्यास लिने घोषणा गरेका हुन् ।
पाकिस्तान र वेष्ट इन्डिजबिचको श्रृँखला आउने अप्रिल २२ देखि सुरु हुनेछ । ३९ वर्षका खान टेस्ट क्रिकेटमा पाकिस्तानका धेरै रन बनाउने खेलाडी हुन् । सन् २००० मा डेब्यु गरेको उनले एक सय १५ टेस्ट क्रिकेटमा अहिलेसम्म ९ हजार ९ सय ७७ रन बनाएका छन् । यसक्रमा ३४ शतक प्रहार गरेका उनको औषत रन ५३.०३ छ । उनले अहिलेसम्म एकै खेलमा बनाएको सर्वाधिक रन ३१३ हो ।
आफूले सोचेर सन्यासको घोषणा गरेको र यो नै आफ्ना लागि सन्यास लिने उपयुक्त समय लागेको उनले बताए । उनी पाकिस्तानको टेस्ट, एक दिवसीय तथा ट्वेन्टी–ट्वेन्टी टिमका पूर्व कप्तान पनि हुने । उनले आफ्नो कप्तानीमा पाकिस्तानलाई सन् २००९ मा ट्वेन्टी–ट्वेन्टी विश्वकपको उपाधि दिलाएका थिए ।
