टोकियो– जापानी महिलाले गत २५ वर्षसम्म पाएको विश्वमा सबैभन्दा धेरै समय बाँच्ने जनताको कीर्तिमान सन् २०११ मा गुमाएको अधिकारीहरूले जानकारी दिएका छन् । अधिकारीहरूले जापानमा गएको भूकम्प तथा सुनामीका कारण महिलाको औसत अपेक्षित आयु घटेको धारणा राखेका छन् ।
जापानीहरू आफ्नो परम्परागत स्वास्थ्य, खाना तथा सक्रिय जीवनशैलीका कारण विश्वमै सबैभन्दा बढी बाँच्ने जनताको रूपमा ख्यातिप्राप्त छन् । स्वास्थ्य मन्त्रालयले सन् २०१० मा महिलाको अपेक्षित औसत आयु ८६.३ रहेकोमा सन् २०११ मा ८५.९ वर्षमा झरेको उल्लेख गरेको छ ।
जापानी महिलाले सन् १९८५ पछि विश्वमा सबैभन्दा बढी समय बाँच्ने जनताको स्तर प्राप्त गरेकोमा सन् २०११ मा यो स्थानी हङकङका महिलाले प्राप्त गरेका छन् र यहाँका महिलाको अपेक्षित औषत आयु ८६.७ वर्ष रहेको देखिएको छ । तेस्रो स्थानमा स्पेनी महिला (८४.९ वर्ष) तथा चौँथो स्थानमा फ्रान्सेली महिला (८४.८) वर्ष रहेका छन् ।
जापानी पुरुषको औसत आयु पनि ७९.४ वर्षमा झरेको छ ।
