टोकियो – बिबिसी नेपाली सेवाको जापानमा छायाङ्कन गरिएको टेलिभिजन कार्यक्रम साझा सवालको अर्को शृँखला आउने आइतवार प्रसारण हुने भएको छ ।
गत बर्षको महाभूकम्प तथा सुनामी प्रभावित क्षेत्र सेन्दाई तथा फुकुसीमा पुगेर बिबिसी युनिटले उक्त कार्यक्रमको रेकर्ड गरेको थियो ।
युनिटले भूकम्प तथा सुनामीद्वारा क्षतिग्रस्त क्षेत्रमा पुगेर पीडित तथा सम्बन्धित निकायका अधिकारीहरुसंग प्रत्यक्ष भेटवार्ता गरी जापानले दैवीप्रकोपजन्य बिपत्तिलाई कसरी सामना गर्न सक्यो र बिपत्तिपछिको कहालिलाग्दो स्थितिको कसरी ब्यवस्थापन गर्यो भन्ने बिषयमा केन्द्रित रही अबको साझा सवाल प्रसारण हुन गईरहेको उक्त कार्यक्रमका प्रस्तोता नारायण श्रेष्ठले बताए ।
साझा सवाल कार्यक्रमका लागि बिबिसी युनिट गत अप्रिलमा जापान आएको थियो । त्यसबेला रेकर्ड गरिएको जापानका नेपालीहरुको अवस्था लगायत विविध पक्ष बारेको साझा सवालको पहिलो शृँखला भने गत आइतवार प्रसारण भईसकेको छ । साबिकै समयतालिकामा भूकम्प तथा सुनामी प्रभावित क्षेत्रमा छायाङ्कन गरिएको कार्यक्रम अबको शृँखलामा प्रसारण गरिने भएको हो । ****
