टोकियो – गत हप्ता नागोयामा आत्महत्या गरेका लाक्पा शेर्पाको आज नागोयास्थित तोकुरिन्जी गुम्बामा अन्तिम सँस्कार गरिएको छ । श्रीमतीसंग मनमुताव भई बिछोडिनु परेको पीडा खप्न नसकी आत्महत्याको बाटो रोजेको लाक्पाले सुसाइड नोटमा लेखेको बताईएको छ ।
शेर्पा संघ जापानमा आबद्ध आइचीकेनमा बसोबास गर्ने शेर्पाहरु भेला भई शुरुमा शेर्पा परम्पराअनुसार दिवंगत आत्माको चिरशान्तिका लागि पूजापाठ गरिएको थियो भने त्यसपछि जापानी श्रीमती बिहे गरेका मृतक शेर्पाको जापानी पम्पराअनुसार डाहसँस्कार गरिएको थियो ।
अचानक आत्महत्याको बाटो रोजेका शेर्पाले लेखेर छोडेको सुसाइड नोटमा श्रीमतीसंग ठूलो झगडा परी छुट्टिनुपरेको बिछोडको पींडा खप्न नसकी आत्महत्याको बाटो रोजेको उल्लेख गरिएको नागोयाबाट शेर्पा संघ नागोयाका महासचिव पेम्बा शेर्पाले बताएका छन् ।
सोलुखुम्बुका २९ बर्षिय लाक्पा ७ बर्ष अगाडि जापान आएका थिए । उनले गत शनिबारको दिन आत्महत्या गरेका थिए । उनी आईची केनको कोमाकी सिटीमा बस्दै आएका थिए । ***
