टोकियो – जापानको टोकियोमा अवस्थित विश्वकै सबैभन्दा अग्लो टावर टोकियो स्काई ट्री मंगलबारबाट सर्वसाधारणका लागि खुला गरिएको छ। यसको उद्घाटनका अवसरमा करिव ८ हजार दर्शकले ६ सय ३४ मिटर उचाइमा पुगेर अवलोकन गर्न उच्च गतिको एलिभेटरको प्रयोग गरेका थिए । धेरैलाई टावर चढ्ने टिकट किन्न लामो प्रतीक्षा गरेका थिए ।
स्काई ट्रीले गिनिज बुक अफ वल्ड रेकर्डमा सबैभन्दा अग्लो टावरको रुपमा नाम लेखाएको छ । यो चीनको ६ सय मिटर अग्लो क्यान्टोन टावर भन्दा अग्लो छ। त्यस्तै विश्वको सबैभन्दा अग्लो भवन दुबईको बुर्ज खलिफाको उचाई ८ सय २८ मिटर भए पनि यसलाई टावर मानिदैन ।
स्काई ट्रीको प्रयोग पर्यटकलाई आकर्षित गर्नुका साथै टेलिभिजन र रेडियोको ब्रोडकास्ट टावरका रुपमा प्रयोग गरिने छ । यसले सन् १९५८ देखि जापानको सबैभन्दा अग्लो टावरका रुपमा रहेको ३ सय ३३ मिटर अग्लो टोकियो टावरलाई विस्थापित गरेको छ ।
