टोकियो – म्याग्दी जिल्लाको ज्यामरुककोट गाबिस-१ बगर घर भई सन् २०१० को अक्टोबरतिर जापान आएका देवबहादुर घर्ति लामो समयदेखि सम्पर्कबिहिन रहेकोले उनको जीवन-मरणको समेत ठेगान नभएकोले भेट्नुहुने वा थाहा पाउने महानुभावले सूचना गर्न उनको परिवारले अनुरोध गरेको छ ।
पारिवारिक श्रोतकाअनुसार कुक भिसामा जापान आएका घर्तिले जापान आएदेखि जम्मा १ पटक घरमा फोन गरेका थिए भने ९० हजार रुपैंया पैसा पनि पठाएका थिए । त्यसपछि उनी सम्पर्कबिहिन अवस्थामा छन् । उनी जापानको कुन शहरमा के काम गर्दैथिए त्यसबारे पनि परिवार अनभिज्ञ छ ।
अनुमानित ३३, ३४ बर्षका घर्ति गत बर्षको महाभूकम्प र सुनामीभन्दा अगाडि १ पटक मात्र सम्पर्कमा आएका थिए । श्रीमती, छोराछोरी लगायत उनको परिवार अहिले नेपालमा झण्डै विचल्ली अवस्थामा रहेको बताईएको छ । ‘भेट्नुहुने वा उहाँको बारेमा थाहा पाउनुहुने महानुभावहरुले खबर गर्नुहुन अनुनय-विनयपूर्वक हार्दिक अनुरोध गर्दछु’ – श्रीमती घर्तिले भनिन् । उनको बारेमा थाहा पाउनु हुनेले जापानमै जानकारी गराउन ०३-६३८५-१३४३ मा सम्पर्क गर्न सकिने पनि परिवारले जनाएको छ ।
अज्ञानताका कारण परिवारले अहिलेसम्म कहिंकतै सोधीखोजीको पहल नगरेको बुझिएको छ । घर्तिको बारेमा सोधीखोजी गर्ने कार्यमा सहयोग गर्न उनलाई कुक भिसामा जापान ल्याउने रेष्टुरेन्ट मालिकको समेत परिवारले ध्यानाकर्षण गराएको छ । उनको बारेमा कुनै अत्तोपत्तो नलागेमा छिट्टै कानुनी उपचारमा उत्रने पारिवारिक तैयारी भईरहेको थाहा भएको छ । घर्तिलाई जापान ल्याउने मालिकको बारेमा भने परिवारले अहिले नै केहि खुलाउन चाहेन । आवश्यक परेमा उचित समयमा खुलाउने परिवार श्रोतले जनाएको छ । **
