टोकियो – थकाली सेवा समिति जापानद्वारा आयोजना गरिएको शुभकामना साँझका लागि आमन्त्रित चर्चित कलाकारहरु मेरी बास्सैका जोडी धुर्मुस (सीताराम कट्टेल) र सुन्तली (कुञ्जना घिमिरे) पप गायक धिरज राई र आधुनिक गायक प्रमोद खरेल आज स्वदेशतर्फ प्रस्थान गरेका छन् । उनीहरुलाई नारिता विमानस्थलमा आयोजक सँस्थाका अध्यक्ष शरदकुमार गौचनले बिदाई गरे ।
कलाकारहरुलाई गएराती आयोजक सँस्था थसेस जापानले एक समारोहकाबिच बिदाई गरेको थियो । टोकियो हातानोदाईस्थित स्माईल रेष्टुरेन्टमा मैत्रिपूर्ण रात्रीभोजसहित कलाकारहरुलाई बिदाई गरिएको हो । सो अवसरमा आयोजक सँस्थाका अध्यक्ष गौचनलगायतका पदाधिकारीहरुले फूलको गुच्छा र खादार्पण गरी उनीहरुलाई बिदाई गरेका थिए । उनीहरुलाई कार्यक्रम संयोजक राजु शेरचनले हार्दिक धन्यबादसहित प्रशंसापत्र प्रदान गरेका थिए । कलाकारहरुले पनि मन्तब्यसहित आ-आफ़्नो प्रतिभा पस्केर मनोरन्जन प्रदान गरेका थिए ।
यसअघि कलाकारहरु धुर्मुस (सीताराम कट्टेल), सुन्तली (कुञ्जना घिमिरे) पप गायक धिरज राई र आधुनिक गायक प्रमोद खरेल समुद्रपारि डट कम, नेपाली समाचार र नेपाल जापान डट कमलगायतका जापानका नेपाली मिडियासंगको भेटघाट र कुराकानीमा ब्यस्त रहेका थिए ।
कलाकारहरुले गत आइतवार मेगुरो कुमिन सेन्टरमा आयोजित शुभकामना सांझमा उत्कृष्ट साँगीतिक प्रस्तुती गरेका थिए । जसलाई जापानका नेपाली दर्शकहरुले निकै मन पराएका थिए ।
कलाकारहरु हङकङ हुंदै आजै राती १० बजे नेपाल पुग्ने कार्यक्रम रहेको थसेस श्रोतले जनाएको छ । ***
टोकियो हातानोदाईस्थित स्माईल रेष्टुरेन्टमा आयोजित मैत्रिपूर्ण रात्रीभोजसहित प्रशंसापत्र प्रदान एवम् बिदाई कार्यक्रमका झलकहरुः
