काठमाडौं- पूर्व रानी कोमलको फागुण ७ गते ६२ औं वर्षमा प्रवेश गर्दैछिन् । उनको ६२औं जन्मोत्सवको उपलक्ष्यमा देशभर विभिन्न कार्यक्रमहरुको आयोजना गरी फागुन ६ गतेदेखि ८ गतेसम्म राजावादीहरुले तीन दिन विभिन्न समारोहहरू आयोजना गर्न लागेको कुरा थाहा भएको छ ।यसै अवसरमा राजधानीमा श्रीमती प्रेरणा पाण्डेको अध्यक्षतामा १५६२ सदस्यीय ६२औं शुभ जन्मोत्सव समारोह समिति गठन गरिएको छ । सो समितिको सह-अध्यक्षमा श्रीमती गीता क्षेत्री राणा र नवराज गुरूङ हुनु हुन्छ भने सदस्य सचिवमा राधेश्याम थापा रहनु भएको छ ।
समितिमा अन्य विशिष्ट व्यक्तिहरू पनि रहनु भएको छ । समारोह समितिका अनुसार फागुन ७ गते आइतबार निर्मल निवास दरवारमा एक विशाल जुलुसले कोमललाई अभिनन्दन पत्र र उपहार चढाउने कार्यक्रम छ ।
यसै उपलक्ष्यमा गुहृयेश्वरी मन्दिरमा अनाथ विद्यार्थीहरूलाई भोजन खुवाउने, मिठाई वितरण, भजन कीर्तन, खाद्यान्न वितरण गर्नुका साथै दीपावली हुने कार्यक्रम रहेको कुरा सो समितिका सदस्य सचिव राधेश्याम थापाले बताउनुभयो ।
