काठमाडौं – पूर्व पञ्चहरूका तीनवटा पार्टीको एकता प्रयास भ्यागुताको धार्नी सावित हुँदै आएको छ । सूर्यबहादुर थापाले नेतृत्व गरेको राष्ट्रिय जनशक्ति पार्टी पशुपति शमशेर जबराले नेतृत्व गरेको राष्ट्रिय प्रजातन्त्र पार्टी दुवैले एकआपसमा मिल्ने लिखत गरेको तीन वर्ष पूरा भइसक्दा पनि उनीहरूबीच एकता भइसकेको छैन । यद्यपि दुवै पार्टी तल्ला तहमा अधिवेशन भने गर्दै आइरहेका छन् ।
यसैबीच बेलाबेलामा हल्लीखल्ली हुने अनि बेलाबेलामा सेलाउने गरेको कमल थापाले नेतृत्व गरेको पूर्व पञ्चहरूको अर्को एक घटक राप्रपा नेपालसहितको एकता प्रयासलाई अहिले बढी तीव्रता दिइएको थाहा भएको छ । एक साताका लागि भनेर महिना दिनअघि सुरु भएको पूर्व राजा ज्ञानेन्द्रको भारत भ्रमण पूरा नहुँदै पूर्वपञ्चहरूले एकता प्रयासलाई तीव्रता दिनुलाई भने संयोग मात्र भन्न मिल्दैन । यसै सिलसिलामा गत शुक्रबार पूर्व प्रधानमन्त्री लोकेन्द्रबहादुर चन्दको लोकन्थलीस्थित निवासमा यो तीन वटै समूहका केही नेताहरूको महत्वपूर्ण बैठक बसेको थाहा भएको छ ।
लोकेन्द्रबहादुर चन्द, राजेश्वर देवकोटा, पद्मसुन्दर लावती, बुद्धिमान तामाङ, हरिबहादुर बस्नेत, केशरबहादुर विष्ट, नारायणदत्त भट्ट, बिक्रमबहादुर थापालगायतका तीन वटै समूहका एक दर्जन नेताहरूले सो बैठकमा पूर्वपञ्चहरूबीच एकता नभएमा आ-आफ्नो अस्तित्व समाप्त हुने निष्कर्ष निकालेका छन् । खासगरी तीन ठूला दल र मधेसी मोर्चासँग प्रतिस्पर्धा गर्न एउटा बलियो वैकल्पिक प्रजातान्त्रिक शक्ति निर्माणको अपरिहार्यतालाई ध्यानमा राखेर यस्तो आवश्यकताको निष्कर्ष उनीहरूले निकालेका थिए ।
बैठकमा सहभागी नेताहरूले एकता प्रयासमा तीनवटै दलका अध्यक्षहरूलाई सहमतिमा ल्याउने नभए चौथो शक्ति खडा गरेर उनीहरूलाई दवाव दिने निष्कर्ष पनि निकालेको थाहा भएको छ । राप्रपा नेपालले अँगालेको राजासहितको प्रजातन्त्र र हिन्दु धर्मसापेक्ष राज्यको परिकल्पनामा अहिलेसम्म राप्रपा र राजपा सहमत हुन सकेका छैनन् । तर बैठकका सहभागी नेताहरूका अनुसार एकताको बाधक शक्ति सिद्धान्त नभएर पोजिसनको हो भन्ने निष्कर्षमा समेत पुगेका छन् । वैठक पछि सहभागी नेताहरूले यो एकता अभियानलाई टुङ्गोमा पुर्याएरै छाड्ने नभए जे गर्नु पर्छ त्यो गर्ने भन्नेसम्मको प्रतिक्रिया पनि दिन थालेका छन् ।
पूर्वपञ्चहरूको यो एकता प्रयासको एउटा लक्षण गत आइतवार राजधानीको बार एशोसियनको हलमा महागुरु फाल्गुनन्द ट्रष्टका लागि ज्ञान महायज्ञ सञ्चालन गर्ने तयारी बैठकमा पनि देखियो । ट्रष्टका सल्लाहकार राप्रपा नेपालका सहअध्यक्ष पद्मसुन्दर लावतीको विशेष सक्रियतामा आयोजित सो बैठकमा राप्रपाका नेताहरू राजेश्वर देवकोटा र पशुपति शमशेर जबराको पनि विशेष उपस्थिति थियो । ट्रष्टका लागि श्रीमद् भागवत सप्ताह आगामी चैत १२ गतेदेखि १८ गतेसम्म पशुपति विकास क्षेत्रको बनकालीमा हुने सम्पन्न हुन गईरहेको छ । ***
