टोकियो – आपूर्ति मन्त्री हुँदा ८५ लाख रुपैयाँका लागि राजधानी काठमाडौंबाट एक ब्यापारी अपहरण गर्ने नेता श्यामसुन्दर गुप्ताले आज छोराको बिहे हेर्न नपाउने भएका छन् । ब्यापारी अपहरण प्रकरणका योजनाकार भएको अभियोगमा प्रहरीले उनलाई हिजो हिरासतमा लिएको छ । प्रहरीले उनलाई सिध्दार्थनगर नगरपालिकास्थित आफ़्नै घरबाट पक्राउ गरेको हो ।
गत पुस ७ गते एकाबिहानै काठमाडौंको कमलादी गणेशस्थानमा दर्शन गर्न गएका व्यवसायी पवनकुमार सांघाई अपहरणमा परेका हुन् । पवन सांघाई ग्रुपका मालिक हुन् । बैंक, बिमा कम्पनी, चिया उत्पादन, डिपार्टमेण्ट स्टोर लगायतमा यो समुहको लगानी छ । अपहरणमा परेको कैयौं दिन बित्दासम्म पनि प्रहरीले सुइँको पाउन सकेन । अपहरणपछि तराई रेड आर्मी नामको समूहले परिवारलाई फोन गर्दै दश करोड रुपैयाँ फिरौती माग गरेछन् । पुस २७ गते पवन आफै घर आइपुगे । परिवारजनले फिरौती तिरेर मुक्त गराएको भनिए पनि कति रुपैयाँ तिरेको भन्ने थाहा भएको थिएन । अपहरणका योजनाकार पूर्वमन्त्री, नेपाल सद्भावना पार्टी (आनन्दीदेवी) का अध्यक्ष तथा हालका सभासद श्यामसुन्दर गुप्ता रहेछन् । करोडको माग गरे पनि बार्गेनिङमा ८५ लाख रुपैयाँ लिएर छाडेका रहेछन् । अपहरण गरेर उनीहरुले पवनलाई काभ्रेको सर्स्यूखर्क घरमा पो बन्धक बनाएर राखेका रहेछन् २० दिनसम्म । गुप्ताले अपहरण गर्नेहरुलाई ४/४ लाख रुपैयाँमात्र दिएर अरु सबै आफैले खाएछन् । त्यसमध्ये पक्राउ परेका आकाश लामाबाट ३ लाख ५५ हजार र बिकास लामाबाट २ लाख रुपैयाँ बरामद भएको रहेछ । यो कुरा थाहा पाएपछि प्रहरीले हिजो भैरहवाबाट गुप्तालाई पक्राउ गरेको थियो । उनलाई अहिले काठमाडौं ल्याइएको थाहा भएको छ । ***
