नुवाकोट (त्रिशूली)- रेन्बो ट्राउट माछाको व्यावसायिक पालन गर्ने नेपालकै पहिलो जिल्ला नुवाकोटमा अहिले पनि देशकै ६० प्रतिशतभन्दा बढी ट्राउट माछा उत्पादन गरेको छ ।आफ्नो देशबाट भित्रिएको माछाको सफलतापूर्वक व्यावसायिक प्रवर्द्धन गर्न र यहाँको माछापालनको अवस्था बुझ्न नेपालका लागि जापानी राजदूत क्युनियो ताकहासियोले माछापालन क्षेत्र ककनीको भ्रमण गर्नुभएको छ ।
पन्ध्र वर्षअघिदेखि निजी क्षेत्रमा सुरु भएको ट्राउट माछापालन पछिल्लो समय आम्दानीको राम्रो स्रोत मात्र बनेको छैन, जिल्लाकै पहिचान रूपमा विकास भएको छ । पछिल्लो पाँच वर्षदेखि एक गाउँ एक उत्पादन कार्यक्रम अन्तर्गत यो व्यवसाय विस्तार भइरहेको छ ।
राजदूत ताकाहासियोले ककनी क्षेत्रका माछाको तीन र्फमको अवलोकनका साथै किसानसँग माछापालनको अवस्थाबारे जानकारी लिनुभएको थियो ।
किसानले ट्राउटको व्यावसायिक विस्तारका लागि भोग्नुपरेका समस्या र यसबाट हुने फाइदाबारे बताएका थिए । कार्यक्रममा नेपाल उद्योग वाणिज्य महासङ्घका पूर्व अध्यक्ष चण्डिराज ढकाल र विनोदबहादुर श्रेष्ठ तथा जापानी सहयोग नियोग जाइकाका प्रतिनिधिसमेत सहभागी थिए ।
कार्यक्रममा माछा वैज्ञानिक साधुराम बस्नेतले नेपालका १३ जिल्लामा ट्राउट माछाको उत्पादन भइरहेको र ५४ जिल्लामा विस्तार गर्न सकिने जानकारी दिनुभयो । निरीक्षणका क्रममा नेपाल उद्योग वाणिज्य सङ्घका अध्यक्ष शरण उत्सुक सापकोटाले जिल्लामा पाँच वर्षको अवधिमा रेन्बो ट्राउट माछाको विकास, सम्भावना र चुनौतीकाबारेमा जानकारी गराउनुभएको थियो ।
राजदूत ताकाहासियोले ककनीमा दुई दशकअघि जापानबाट भित्रिएको स्ट्रबेरीखेती तथा क्युबी (जापानी ऐंसेलु) र भुइँस्याउ खेतीको पनि अवलोकन गर्नुभयो ।
