काठमाडौं– एकीकृत नेकपा माओवादीको संस्थापन पक्षका अधिकांश पोलिटब्यूरो सदस्यहरुले तत्काल विद्रोहबाट क्रान्ति सम्भव नभएको भन्दै शान्ति र संविधान निर्माण मार्फत अघि बढ्नु पर्ने बताएका छन । पार्टी भित्रको विवादबारे छलफल गर्न शनिबार प्रधानमन्त्री निवास बालुवाटारमा बसेको संस्थापन पक्षको छुट्टै भेलामा नेताहरुले यस्तो बताएका हुन्केन्द्रीय समिति बैठकमा पेश गर्ने राजनीतिक प्रतिवेदन तयार पार्न भन्दै अध्यक्ष पुष्पकमल दाहाल ‘प्रचण्ड’, उपाध्यक्ष समेत रहेका प्रधानमन्त्री डा. बाबुराम भट्टराई लगायत संस्थापन पक्षका नेताहरुले आफू पक्षीय नेताहरुलाई बोलाएर पार्टी भित्रको विवाद समाधानका लागि शनिबार बिहान बालुवाटारमा छलफल गरेका हुन ।
भेलामा सहभागी माओवादी पोलिटब्यूरो सदस्य गोपाल किराँतीले आफूहरुले शान्ति र संविधान मार्फत नै क्रान्ति पुरा गर्नुपर्ने सुझाब दिएको बताउनु भयो । ‘तत्काल बिद्रोहबाट क्रान्ति सम्भव छैन भनेर नेतृत्वलाई सुझाव दिएका छौँ’, किराँतीले भन्नुभयो, ‘शान्ति र संविधान मार्फत क्रान्ति पुरा गर्नुपर्छ भन्ने सबैको कुरा थियो ।’
पार्टीका वरिष्ट उपाध्यक्ष मोहन वैद्य ‘किरण’ पक्षले पार्टी फुटाउने तयारी गरेको भन्दै उनीहरुले पार्टी फुटाउने कुरा सम्भव नभएको बताएका छन । मातृका र रवीन्द्र जस्तो गुट खोलिएमा त्यसले प्रतिक्रान्तिकारी शक्तिलाई फाईदा पुराउने निष्कर्ष भेलाले निकालेको छ ।
भेलामा सहभागी नेताहरुले पार्टी र क्रान्तिको नेतृत्व प्रचण्ड बाहेक कसैले गर्न नसक्ने भन्दै पार्टीमा प्रचण्डको विकल्पको कुरा गर्न नहुने बताएको श्रोतले जनायो । पोलिटब्यूरो सदस्यसँगको परामर्श र सुझावमा अध्यक्ष पुष्पकमल दाहाल ‘प्रचण्ड’ले पार्टी भित्रको विवाद समाधानमा ठोस कदम चाल्ने माओवादीको संस्थापन पक्षका नेताहरुले बताएका छन ।
भेलामा संस्थापन पक्षका अधिकांश पोलिटब्यूरो सदस्यहरु सहभागी थिए ।
