काठमाडौं– प्रधानमन्त्री डा. बाबुराम भट्टराईले चिनियाँ लगानी भित्र्याउन भारतसित जस्तै द्विपक्षीय लगानी प्रवद्र्धन तथा संरक्षण (बिप्पा) चीनसित पनि अर्को सम्झौता हुने बताउनुभएको छ । आफ्नै निवास बालुवाटारमा शनिबार पत्रकारसित प्रधानमन्त्री भट्टराईले पुसको पहिलो हप्ता हुने चिनीयाँ प्रधानमन्त्रीको भ्रमणमा त्यस्तो सम्झौता हुने बताउनुभयो ।आगामी वर्षलाई लगानी वर्ष घोषणा गरी पाँच छ अर्ब अमेरिकी डलर भित्र्याउने उद्देश्यका साथ काम भइरहेको प्रधानमन्त्रीको दाबी छ । शान्ति प्रक्रिया र संविधान निर्माणमा प्रगति हुनु आफ्नो तीन महिने कार्यकालको सबैभन्दा ठूलो उपलब्धि भएको प्रधानमन्त्री भट्टराईले दाबी गर्नुभयो ।
फरक धारका दलसित मिलेर सरकार चलाउँदा अपेक्षा अनुसार सुशासन कायम गर्न नसकेको प्रधानमन्त्रीले स्वीकार गर्नुभयो । काठमाडौं उपत्यकामा चौबीसै घण्टा सार्वजनिक यातायात संचालन गर्ने तयारी भइरहेको पनि उहाँले जानकारी दिनुभयो ।
भट्टराईले दुई महिनाभित्र प्रधानमन्त्री कार्यालय सिंहदरबारलाई अपाङग मैत्री बनाउने दाबी पनि गर्नुभयो । प्रधानमन्त्री डा. बाबुराम भट्टराईको भारत भ्रमणका क्रममा कात्तिक ४ गते भारतसँग बिप्पा सम्झौता भएको थियो ।
