टोकियो – जापानको चिबा प्रान्तस्थित एउटा प्राथमिक विद्यालयले ‘बुलिङ’ (सहपाठीबाट हुने दुर्व्यवहार) को घटनामा देखाएको उदासीनताका कारण एक बालकले विद्यालय नै परिवर्तन गर्नुपरेको छ । स्थानीय शिक्षा बोर्डले यस घटनामा विद्यालयको प्रतिक्रिया ‘अपूर्ण र अनुपयुक्त’ रहेको स्वीकार गरेको छ ।
कक्षा ४ मा अध्ययनरत ती बालकलाई सन् २०२४ सेप्टेम्बरदेखि नै सहपाठीहरूले सामूहिक रूपमा एक्लाउने र कुटपिट गर्ने गरेका थिए । अक्टोबरमा हिंसा झनै उग्र बन्यो । सहपाठीहरूले उनको टाउको र घाँटीमा लात्तीले हान्ने, पेटमा मुक्का प्रहार गर्ने र छाताले घोच्ने जस्ता हिंस्रक व्यवहार गरेका थिए । एक पटक त शिक्षकले आफैँ कुटपिट देख्दा पनि उचित कदम चालेनन् ।
नोभेम्बरमा विद्यालयले लिएको आन्तरिक सर्वेक्षणमा बालकले आफू पीडित भएको लिखित जानकारी दिएका थिए । तर, शिक्षकले बालकको विस्तृत कुरा नसुनी र अभिभावकलाई समेत खबर नगरी केवल पीडक पक्षलाई माफी माग्न लगाएर घटना टुङ्ग्याउन खोजे । विद्यालयको यस्तो लापरवाहीका कारण बालक मानसिक र शारीरिक रूपमा त्रसित भई अनिद्रा, वाकवाकी र टाउको दुख्ने समस्याबाट पीडित भए ।
बालककी आमाले विद्यालयले हिंसाको गम्भीरतालाई कम आँकेको र समयमै जानकारी नदिएको आरोप लगाएकी छिन् । विद्यालयले बालकको मेडिकल रिपोर्ट शिक्षा बोर्डमा बुझाउन समेत ढिलाइ गरेको थियो । विद्यालय प्रशासनप्रति पूर्ण अविश्वास व्यक्त गर्दै बालकले अन्ततः सन् २०२६ जनवरीमा अर्को विद्यालयमा भर्ना हुनुपर्यो ।
कानुनी विज्ञहरूले विद्यालयको यो ढिलासुस्तीलाई जापानको ‘बुलिङ रोकथाम ऐन’ को उल्लंघन भनेका छन् । हाल एक स्वतन्त्र समितिले यस घटनाको विस्तृत अनुसन्धान गरिरहेको छ । पीडित बालकले विद्यालयले आफूलाई सुरक्षा दिन नसकेको भन्दै ठूलो धोका महसुस गरेको बताएका छन् ।
