समाचार सुन्नुहोस :
काठमाडौँ – पूर्वनेपाल प्रहरी महानिरीक्षक (आईजीपी) सर्वेन्द्र खनालले ‘समुन्नत नेपाल पार्टी’ नामक नयाँ राजनीतिक दल गठन गरेका छन्। उनले पार्टी दर्ताका लागि ४१ सदस्यीय कार्यसमितिको प्रस्तावसहित निर्वाचन आयोगमा निवेदन दिएको जानकारी दिएका छन्। खनाल स्वयं पार्टीका अध्यक्ष रहनेछन्।
एमालेबाट राजीनामा दिएपछि खनालले आगामी निर्वाचनमा भाग लिन नयाँ दल खोलेका हुन्। उनले सुशासन र समृद्धिलाई मुख्य एजेन्डा बनाएर चुनावी प्रतिस्पर्धामा उत्रिने योजना सार्वजनिक गरेका छन्। ३० वर्षे प्रहरी सेवा सकेर तीन वर्ष नबित्दै खनाल २०७९ असोजमा एमालेमा प्रवेश गरेका थिए। तर उनको चुनावी यात्रा सफल हुन सकेन। २०७९ को प्रतिनिधिसभा चुनावमा काठमाडौं–६ बाट उनले रास्वपाका शिशिर खनालसँग पराजय व्यहोरे—शिशिरले १४ हजार २ सय ४ मत पाउँदा खनालले ८ हजार ९ सय ११ मत ल्याए।
त्यसपछि ६ महिनामै भएको उपचुनावमा पनि उनी एमाले उम्मेदवार बने तर पुनः रास्वपाका स्वर्णिम वाग्लेसँग हार माने। वाग्लेले ३४ हजार ९ सय १८ मत पाउँदा खनाल ८ हजार ४ सय ८८ मतसहित तेस्रो बने। तनहुँ–२ उपचुनावमा कांग्रेसका गोविन्द भट्टराई विजयी बनेका थिए। खनालको लगातारको चुनावी हारपछि अब नयाँ पार्टीमार्फत उनको राजनीतिक यात्रा पुनः सुरु हुने संकेत मिलेको छ।
