समाचार सुन्नुहोस :
काठमाडौँ – सैन्य मिसन सकेर फर्किँदै गरेको टर्की वायुसेनाको कार्गो विमान मंगलबार जर्जिया–अजरबैजान सीमा नजिक दुर्घटनाग्रस्त हुँदा विमानमा सवार सबै २० जनाको मृत्यु भएको टर्कीको रक्षा मन्त्रालयले जनाएको छ।
मन्त्रालयका अनुसार सी–१३० हरक्यूलिस प्रकारको उक्त विमान नियमित उडानमा जर्जियाको सिघ्नाघी क्षेत्र नजिक, अजरबैजान सीमाबाट करिब पाँच किलोमिटर टाढा दुर्घटनाग्रस्त भएको हो। उद्धार टोली घटनास्थल पुगेपछि कसैलाई पनि जीवित फेला पार्न नसकिएको जर्जियाली अधिकारीहरूले जनाएका छन्।
जर्जियाको हवाई यातायात नियन्त्रक संस्था ‘साकाएरोनाभिगेत्सिया’ का अनुसार विमान जर्जियाको हवाई क्षेत्रमा प्रवेश गरेलगत्तै राडारबाट अचानक हराएको थियो। केही मिनेटपछि सीमावर्ती डोंगर क्षेत्रमा ठूलो आगोको लप्का देखिएपछि सुरक्षाकर्मीहरूले खोज तथा उद्धार कार्य सुरु गरेका थिए।
दुर्घटनाको कारण प्रारम्भिक रूपमा प्राविधिक समस्या हुन सक्ने अनुमान गरिएको छ भने औपचारिक अनुसन्धान सुरु गरिएको रक्षा मन्त्रालयले जनाएको छ। टर्कीका राष्ट्रपति रेचेप तैयप एर्दोगानले ज्यान गुमाएका सैनिकप्रति श्रद्धाञ्जलि व्यक्त गर्दै परिवारजनप्रति समवेदना व्यक्त गरेका छन्।
विमान पूर्ण रूपमा जलेको अवस्थामै फेला परेको र यो पछिल्ला वर्षहरूमा टर्की वायुसेनाको सबैभन्दा ठूलो सैन्य विमान दुर्घटनामध्ये एक भएको जनाइएको छ।
