टोकियो – मध्य जापानको मी प्रान्तस्थित एक एक्सप्रेस-वेको सुरुङभित्र शुक्रबार बिहान भएको भयानक सवारी दुर्घटनामा बालबालिकासहित ६ जनाको मृत्यु भएको छ । चारवटा सवारी साधन एकआपसमा ठोक्किएर भएको उक्त दुर्घटनापछि सवारीमा आगलागीसमेत भएको स्थानीय अधिकारीहरूले जनाएका छन् ।
प्रहरी र दमकल विभागका अनुसार कामेयामास्थित ‘सिन-मेशिन एक्सप्रेस-वे’ को सुरुङभित्र बिहान करिब २:२० बजे एउटा तीव्र गतिको ट्रकले अगाडि रहेका दुईवटा कार र एउटा ट्रेलरलाई ठक्कर दिएको थियो । ठक्कर लगत्तै ट्रक र कारहरूमा भीषण आगलागी भएको थियो । मृत्यु हुने ६ जना नै कारमा सवार यात्रुहरू रहेको र उनीहरूको जलेर मृत्यु भएको प्रहरीले जनाएको छ ।
दुर्घटनाको समयमा सो सडक खण्डमा निर्माण कार्य चलिरहेका कारण ट्राफिक जाम भएको थियो । जाममा रोकिएका सवारी साधनहरूलाई पछाडिबाट आएको ट्रकले जोतेको प्रत्यक्षदर्शीले बताएका छन् । दमकल विभागलाई प्राप्त आपत्कालीन सूचना अनुसार, ट्रकले जाममा फसेका सवारी साधनहरूको लामलाई ठक्कर दिँदा यो भयावह स्थिति सिर्जना भएको हो ।
प्रहरीले ट्रक चालक ५४ वर्षीया मित्सुयो मिजुतानीलाई ‘लापरबाहीपूर्वक सवारी चलाएर ज्यान लिएको’ अभियोगमा पक्राउ गरेको छ । मिजुतानीले आफ्नो गल्ती स्वीकार गरेको प्रहरीको भनाइ छ ।
दुर्घटनामा ट्रक चालक र सबैभन्दा अगाडि रहेको ट्रेलरका चालकलाई भने कुनै चोटपटक लागेको छैन । सुरुङभित्र भएको आगलागीका कारण उद्धार कार्यमा केही समय कठिनाइ भएको थियो । प्रहरीले मृतकहरूको पहिचान खुलाउने र दुर्घटनाको थप विस्तृत अनुसन्धान गरिरहेको जनाएको छ ।
