टोकियो – जापानमा कार्यरत विदेशी कामदारहरूको हक-हित संरक्षण र उनीहरूमाथि हुने विभेद एवं ‘जेनोफोबिया’ (विदेशीप्रतिको घृणा) विरुद्ध आइतबार राजधानी टोकियोमा विरोध प्रदर्शन गरिएको छ ।
‘मार्च इन मार्च २०२६’ नाम दिइएको उक्त र्यालीमा करिब ३५० जनाको सहभागिता थियो । टोकियोको उएनो पार्क वरपर निकालिएको यस प्रदर्शनमा अघिल्लो वर्षको तुलनामा सहभागिता बढेको छ । सन् २०२५ को माथिल्लो सदन (हाउस अफ काउन्सिलर्स) को निर्वाचनताका विदेशी कामदारप्रति बढेको नकारात्मक टिप्पणी र घृणास्पद अभिव्यक्तिका कारण कामदार र नागरिकहरूमाझ चिन्ता बढेको छ ।
सन् १९९३ देखि ‘विदेशी कामदारको वसन्तकालीन श्रम आन्दोलन’का रूपमा सुरु भएको यो अभियानले विदेशी कामदारको कार्यदशा सुधार र अधिकारको माग गर्दै आएको छ । प्रदर्शनमा सहभागीहरूले ‘हामी यहाँ छौँ’ भन्दै सहअस्तित्वको समाज निर्माणका लागि आवाज उठाएका थिए ।
नेसनल युनियन अफ जनरल वर्कर्स टोकियो नाम्बुकी अध्यक्ष युमिको नाकाजिमाले पछिल्लो समय विदेशी कामदारहरूले कार्यस्थलमा विभेद भोग्ने र सार्वजनिक यातायातमा समेत नराम्रो दृष्टिकोणको सामना गर्नुपरेको बताए । ३० वर्षदेखि यस क्षेत्रमा कार्यरत नाकाजिमाले भने, ‘समाजमा घृणा फैलिनु चिन्ताको विषय हो, यसले ठूलो संकट निम्त्याउन सक्छ ।’
साम्बा संगीतको टोलीसहित निस्किएको र्यालीमा सहभागीहरूले ‘घृणालाई नाइँ’ र ‘श्रमिकको विभाजन अन्त्य गरौँ’ लेखिएका प्लेकार्ड बोकेका थिए । केही प्लेकार्डमा ‘तपाईंले खाने बेन्टो (बक्स लन्च) मैले बनाएको हुँ’ र ‘तपाईंका लुगा मैले नै आइरन गरेको हुँ’ जस्ता सन्देश लेखिएका थिए, जसले जापानी समाजमा विदेशी कामदारको अपरिहार्य योगदानलाई झल्काउँथ्यो ।
प्रदर्शनमा सहभागी एक विदेशी कामदारले भने, ‘हामी यस देशमा काम गर्छौँ, कर तिर्छौँ र समाजमा योगदान दिन्छौँ । आप्रवासन र बाँच्न पाउनु कुनै अपराध होइन ।’
