समाचार सुन्नुहोस :
काठमाडौँ दुबई अन्तर्राष्ट्रिय विमानस्थलमा उडान सेवा अस्थायी रूपमा रोकिएको छ। यात्रु र विमानस्थलमा कार्यरत कर्मचारीको सुरक्षा ध्यानमा राख्दै यस्तो निर्णय गरिएको अधिकारीहरूले बताएका छन्। विमानस्थल नजिकै ड्रोनसँग सम्बन्धित घटनाका कारण इन्धन ट्याङ्की प्रभावित भई आगलागी भएपछि उडान स्थगित गरिएको जनाइएको छ। सो आगलागी नियन्त्रणमा ल्याउन अहिले आपत्कालीन टोलीले काम गरिरहेको जनाइएको छ।
अधिकारीहरूले यात्रुहरूलाई आफ्नो उडानको अवस्था बुझ्न सम्बन्धित एयरलाइन्ससँग सम्पर्क गर्न आग्रह गरेका छन्। दुबईको यो विमानस्थल अन्तर्राष्ट्रिय यात्रु आवागमनका हिसाबले विश्वकै अत्यन्त व्यस्त विमानस्थलमध्ये एक हो। सन् २०२५ मा मात्रै करिब ९ करोड यात्रुले यस विमानस्थलमार्फत यात्रा गरेका थिए।
