टोकियो – जापानको यामागाटा र टोयामा प्रिफेक्चरमा आपतकालीन आदेशअन्तर्गत शिकार राइफल प्रयोग गरी चार भालुको शिकार गरिएको छ । यामागाटा प्रिफेक्चरको साकाता शहरमा एउटा शिन्तो तीर्थस्थल नजिकै सोमबार बिहान भालुहरू देखिएपछि स्थानीय सरकारले आपतकालीन आदेश जारी गरेको थियो । यस घटनामा कुनै पनि व्यक्ति घाइते भएका छैनन् ।
शहर र प्रहरीका अनुसार बिहान करिब ७ बजे एक स्थानीय बासिन्दाले योनेशिमा क्षेत्रमा रहेको तीर्थस्थल नजिकै एउटा आरुको रूखमा दुई भालु चढेको देखेको खबर गरे । शहरका अधिकारीहरू र प्रहरीले घटनास्थलमा तीनवटा भालु फेला पारे । ती सबै जनावरलाई बिहान ९:३० बजेपछि आदेशअन्तर्गत गोली हानी मारिएको थियो ।
यसैबीच, टोयामा प्रिफेक्चरको टोनामी शहरमा सोमबार एउटा घरको परिसरमा भालु देखिएको थियो । शहरले आपतकालीन शिकार राइफल प्रयोग गर्न अनुमति दिएपछि उक्त जनावरलाई गोली हानी मारिएको हो ।
प्रहरीलाई बिहान ६ बजेपछि शोगवा माची क्षेत्रमा भालु देखिएको खबर प्राप्त भएको थियो । स्थानीय अधिकारीहरू र एक शिकार समूहका सदस्यहरूले भालु एउटा भण्डारण कक्षमा रहेको पुष्टि गरे । त्यसपछि ट्राफिक प्रतिबन्धहरू लगाइएको थियो र बासिन्दाहरूलाई सुरक्षित स्थानमा जान आग्रह गरिएको थियो । मेयरले बिहान ८ बजेपछि आपतकालीन आदेशअन्तर्गत गोली चलाउन अनुमति दिए ।
शिकार समूहका एक सदस्यले भण्डारण कक्षको झ्यालबाट भालुलाई गोली हानेर मारेका थिए । त्यतिबेला घरमा चार परिवारका सदस्य थिए। उनीहरू सबै दोस्रो तलामा सुरक्षित थिए र सकुशल रहेको बताइएको छ ।
एक ७० वर्षीय व्यक्तिले आफ्नो घरमा भालु आउनेछ भन्ने कहिल्यै नसोचेकोले आफू निकै छक्क परेको बताए । घटनास्थलमा भालुका पदचिह्न र रगतका दागहरू भेटिए पनि कुनै ठूलो क्षति भने भएको थिएन ।
